Қостанай вилоятида 1 гигаватт қувватга эга шамол электр станцияси қурилади

QOSTANAI. Kazinform - Рудний шаҳрида қайта тикланадиган энергия манбаи пайдо бўлади. Бу ҳақда Марказий коммуникациялар хизмати брифингида Қостанай вилояти ҳокими Қумар Ақсақалов маълум қилди, деб хабар беради Kazinform.

Вилоят раҳбари кейинги йилларда Қостанай вилоятида муқобил энергетикани ривожлантириш борасида жиддий қадамлар қўйилганини таъкидлади. Фойдаланишга топширилган қайта тикланадиган энергия манбаларининг қуввати қарийб икки баравар ошди – 2022 йилдаги 50 МВтдан 2024 йилда 98 МВтгача. Буларнинг барчаси янги шамол электр станциялари қурилиши туфайли амалга ошмоқда.

– Бугунги кунда вилоятда электр энергияси истеъмоли (0,45 ГВт) уни ишлаб чиқаришдан (0,12) 4 баробар кўпдир. Ҳудудда яшил энергияни фаол ривожлантириш давом этмоқда: келгуси йилларда янги шамол электр станциялари, шунингдек, қуёш ва газ поршенли электр станцияларини қуриш режалаштирилган. Бироқ, ҳақиқий ютуқ Рудний шаҳрида кенг кўламли лойиҳани амалга ошириш бўлади. Бу ерда 1 ГВт қувватга эга шамол электр станцияси қурилади, - деди ҳоким.

Станция 165 та шамол турбинаси билан жиҳозланади. Лойиҳа вилоятда электр энергияси ишлаб чиқаришни 9 баробарга оширади.

Умуман олганда, “яшил” лойиҳаларни амалга ошириш туфайли маҳаллий электр энергияси ишлаб чиқариш 9 баробарга (0,12 ГВт дан 1,12 ГВтгача) ошади ва ҳудуд эҳтиёжларини тўлиқ қоплайди.