Коронавирус юқтирганлар ва уйсизлар Европа парламенти биносига жойлаштирилади

NUR-SULTAN. Kazinform – Европа парламенти коронавирусга қарши курашиш ва муҳтож одамларга ёрдам бериш учун бир қатор биноларини тақдим этди. Маҳаллий ҳокимият икки бинони олиб бўлган. Бу ҳақда Kazinform Euronewsга асосланиб хабар беради.

Маҳаллий ҳокимиятга Страсбургдаги ялпи мажлислар ўтказиладиган бино ва Брюсселдаги қўмиталар ва комиссиялар биноси берилди.

Европа Парламенти раиси Давид Сассоли бу вақтинча чора эканига умид қилмоқда.

«Ушбу оғир санитария-епидемиологик вазиятда биз ўз биноларимизни уйсиз ва ҳимоясиз гуруҳларга беришга қарор қилдик», - деди у.

Брюсселдаги Гельмут Коль номидаги корпус иккига бўлинган. Бири доимий манзилга эга бўлмаган одамлар учун, иккинчиси касалхонадан чиқарилган аммо уйига қайтолмайдиган беморлар учун.

Франция расмийлари Страсбургда касаллик юқтирган одамларни даволаш учун тиббий марказ ташкил этилишини маълум қилди.

«Келгуси ҳафталарда диагностика қилиш мумкин. Ушбу пандемия пайтида кўплаб одамлар тестдан ўтказилиши жуда муҳимдир. Касалликдан тузалиб чиққан ёки симптомлари йўқ одамларни изоляция қилиш зарурми ёки йўқми, шуни аниқлаштириш лозим», - деди Европарламент вакили Жауме Дуч.

Март ойининг ўрталаридан бери ЕП депутатлари ва ходимлари масофадан ишламоқда. Янги шароитга мослашиш жуда тез кечди. Сиртқи ялпи мажлис бўлиб ўтди, унда қонун чиқарувчиларнинг 90%и уйдан овоз бердилар.