Корея ва Қозоғистон нодир металлар саноати соҳасида ҳамкорликни ривожлантиради
ASTANA. Кazinform - Корея ва Қозоғистон нодир металлар саноати соҳасида ҳамкорликни ривожлантиради. Бу ҳақда Жанубий Корея Президенти Юн Сок Ёль Ақордада Давлат раҳбари Қасим-Жомарт Тоқаев билан музокаралар якунлари бўйича қўшма баёнотида маълум қилди.
“Ҳозир дунё тобора кучайиб бораётган инқироз ва беқарорлик билан юзлашмоқда. Шу боис, биз – икки давлат раҳбарлари мамлакатларимиз ўртасидаги ҳамкорлик мисли кўрилмаган аҳамиятга эга, деган умумий фикрга келдик. Ахир, ҳозир Корея йирик глобал давлатга айланишга, Қозоғистон эса Янги Қозоғистонни яратишга интилмоқда. Шу мақсадда биз икки давлат ўртасидаги стратегик шерикликни энг ўзаро манфаатли ва келажакка йўналтирилган шерикликка айлантиришга келишиб олдик”, — деди Корея Президенти.
Мартабали меҳмон Қозоғистонга ташрифи чоғида электр энергетикаси соҳасида ҳамкорлик тўғрисида меморандум имзоланганини таъкидлади.
“Шунинг асосида биз эскирган электр станциялари ва қайта тикланувчи энергия манбаларини модернизация қилиш соҳасида ҳамкорликни кучайтиришга келишиб олдик. Шу сабабли биз компанияларимизни қўллаб-қувватлашда давом этамиз. Улар эса Қозоғистон саноатини ривожлантиришда, электр энергияси ишлаб чиқаришни кўпайтиришда иштирок этишда давом этмоқда. Биз Қозоғистоннинг бой минерал ресурслари ва Кореянинг технологик имкониятларини уйғунлаштириб, асосий фойдали қазилмаларни етказиб бериш занжирини мустаҳкамлашга келишиб олдик. Ушбу ташриф доирасида биз асосий фойдали қазилмаларни етказиб бериш занжири билан боғлиқ 3 та англашув меморандумини тузишга келишиб олдик. Шу билан бирга, биз асосий фойдали қазилмалар, жумладан, литийни қидириш, қазиб олиш ва эритиш бўйича ҳамкорликни ривожлантиришга қарор қилдик”, — деди у.
