Қонаев шаҳри ва Алмати вилояти янада ривожланади

None
ASTANA. Kazinform – 13 январ куни Қозоғистон Республикаси Бош вазири Алихан Смаилов Алмати вилоятига амалий ташрифи чоғида берилган топшириқларни амалга ошириш масалалари бўйича йиғилиш ўтказди, дея хабар бермоқда Kazinform ҚР Ҳукумати матбуот хизматига таяниб.

Марказий давлат органлари ва ҳокимликлари раҳбарлари Алмати агломерацияси, Қонаев шаҳри, G4 City интеграциялашган шаҳри ва умуман вилоятни ривожлантириш чора-тадбирлари тўғрисида маъруза қилдилар.

Уй-жойлар, маъмурий ва ижтимоий соҳа объектларини барпо этиш, автомобиль, темир йўл, муҳандислик ва қишлоқ хўжалиги инфратузилмасини модернизация қилиш, ерларни қишлоқ хўжалиги айланмасига киритиш, саноат зоналари ва саноат объектлари самарадорлигини ошириш, янги инвестиция лойиҳаларини амалга ошириш масалалари муҳокама қилинди.

Хусусан, Қонаев шаҳридаги оқова сувларни тозалаш иншоотларини реконструкция қилиш давлат-хусусий шериклик механизми орқали амалга оширилиши таъкидланди.

Шу билан бирга, республика ва халқаро миқёсда кўплаб томошабинларни ўзига тортадиган йирик маданий ва спорт тадбирларини ташкил этиш ва ўтказиш масалалари ҳам суҳбат мавзусига айланди. Улардан бири MotoGP мотоцикл пойгалари бўйича жаҳон чемпионатидир.

Муҳокамаларни якунлар экан, Алихан Смаилов барча иштирокчи давлат органлари янги вилоят маркази – Қонаев шаҳри, G4 City ва бутун вилоятни ривожлантириш билан боғлиқ вазифаларни амалга оширишда масъулият билан ёндашиш зарурлигини таъкидлади.

«Биз барча масалаларни муҳокама қилдик. Давлат органлари ўз олдига қўйилган вазифаларни шунга мос равишда ишлаб чиқиши керак. Вилоят аҳолиси Қонаев шаҳри ва вилоятнинг жадал ривожланишини кутмоқда, шунинг учун маъмурий тартиб-қоидаларни кечиктирмасдан зарур қарорлар қабул қилиш муҳим», – деди Бош вазир.

Ҳукумат раҳбарининг фикрича, кўрилаётган чора-тадбирлар ҳудуд ривожига сезиларли суръат бериши, ўз навбатида, вилоят аҳолисининг турмуш сифати ва фаровонлигини ошириш имконини беради.


Сўнгги хабарлар
telegram