Колумбияда зилзила оқибатида ҳалок бўлганлар сони 300 нафардан ошди
ASTANA. Kazinform — Колумбиядаги зилзила оқибатида 304 киши ҳалок бўлди, яна 426 киши бедарак йўқолган. Бу ҳақда мамлакатда табиий офатлар хавфини бошқариш хизмати маълум қилди, деб хабар беради ТАСС.
Бошқарманинг X ижтимоий тармоғида эълон қилинган маълумотларга кўра, 4548 киши жароҳатланган, 426 киши бедарак йўқолган, 356 киши қутқарилган.
Ҳукуматнинг сўнгги баҳоларига кўра, зилзила оқибатида 29 554 та уй вайрон бўлган, 134 342 та бино шикастланган.
Бундан аввал 281 киши ҳалок бўлгани ҳақида хабар берилган эди.
Табиий офат етказган моддий зарар 30 триллион песо (9,6 миллиард доллар) деб баҳоланяпти. Бу ҳақда Колумбия президенти Абелардо де ла Эсприэлья маълум қилди.
Президентнинг таъкидлашича, дастлабки техник баҳолашларга кўра, Чоко, Валье-дель-Каука, Рисаральда, Киндио ва Кальдас департаментларидаги моддий зарар тахминан 30 триллион песони ташкил этади. Шундан 24,5 триллион песо биноларга, 5,5 триллион песо инфратузилмага тўғри келади.
Эсприэлья мутлақ кўрсаткич бўйича Чоко департаментидаги зарар бошқа ҳудудларга нисбатан камроқ бўлганини, бироқ зилзиланинг нисбий таъсири айнан шу ҳудудда энг юқори эканини таъкидлади.
Эслатиб ўтамиз, магнитудаси 7,4 балл бўлган зилзила 10 августда Колумбиянинг ғарбидаги Чоко департаментида жойлашган Сан-Хосе-дель-Пальмар шаҳри яқинида содир бўлган.
