Колумбияда кўчки оқибатида камида 12 киши ҳалок бўлди

ASTANA. Kazinform - Колумбиянинг марказий қисмидаги тоғли ҳудудда сешанба куни кучли ёмғир туфайли юзага келган кўчки камида 12 кишининг ҳаётига зомин бўлди, бир қанча уйлар вайрон бўлди. Бу ҳақда мамлакат фуқаролик мудофааси агентлиги маълум қилди, деб хабар беради Kazinform Reuters агентлигига таяниб.

Ҳозиргача 12 нафар жасад топилган, улардан икки нафари бола.

Фуқаро мудофааси қутқарувчилари, Қизил Хоч, ўт ўчирувчилар ва ҳарбийлар тонналаб лой ва вайроналар орасидан бедарак йўқолганларни қидиришда давом этмоқда.

Кўчки пойтахт Боготани муҳим қишлоқ хўжалиги ҳудуди бўлган Мета провинциясининг маркази Вильявитенсио билан боғловчи автомобиль йўлини тўсиб қўйди.

Колумбиянинг баланд тоғларида тез-тез ёғаётган кучли ёмғир туфайли кўчкилар одатий ҳол бўлиб қолган.

Путумайо провинциясининг Мокоа шаҳрида 2017 йилда мамлакатдаги сўнгги йирик кўчки 320 дан ортиқ одамнинг ҳаётига зомин бўлган.