Қизилўрдадан Ўзбекистон чегарасигача янги йўл қачон қурилади – ҚР Бош вазири жавоби
ASTANA. Kazinform – Қизилўрда-Ўзбекистон чегарасида янги йўл участкасини қуриш учун 140 миллиард тенгега яқин маблағ керак бўлади. Бу ҳақда ҚР Бош вазири Олжас Бектеновнинг Сенат депутатлари саволига берган жавобида айтилди.
“Қизилўрда – Учқудуқ йўналишининг умумий масофаси 320 километрни ташкил этади, шундан 140 километри Қозоғистон Республикаси ҳудудидан, 180 километри Ўзбекистон ҳудудидан ўтади. Қизилўрда-Ўзбекистон чегарасида янги йўл участкаси қурилиши қиймати қарийб 140 миллиард тенгени ташкил этади. Чегарада автомобилларни назорат қилиш пункти йўқ. Шу сабабли, бундай пунктни қуриш зарурлигини таъкидлаш ўринлидир. Унинг қиймати тахминан 15 миллиард тенгени ташкил этади”, – деди Ҳукумат раҳбари ўз жавобида.
Бош вазирнинг сўзларига кўра, Ақтўбе-Улғайсин йўли участкасини реконструкция қилиш ишлари бошланган. Жорий йилда Осиё инфратузилма инвестиция банкининг кредит маблағлари ҳисобидан қолган 234 километрда қурилиш ишларини бошлаш режалаштирилган. Шунингдек, 2025 йилда 513 километрлик Қарағанди-Жезқазған автомобиль йўлини янгилаш ва Сариағаш шаҳрини айланиб ўтувчи 102 километрлик йўл қурилиши режалаштирилган. Бундан ташқари, 2025 йил 14 мартда бўлиб ўтган Миллий қурултойнинг тўртинчи сессиясида ҚР Президенти Астана шаҳридан Арқалиқ, Торғай ва Ирғиз бўйлаб тўғридан-тўғри Транскаспий халқаро транспорт йўналишига олиб борувчи йўл қурилиши лойиҳасини амалга оширишни бошлаш бўйича топшириқ берган эди.
“Юқоридагилардан келиб чиқиб, транспорт инфратузилмасини ривожлантириш бўйича тасдиқланган режалар ва амалга оширилаётган ишларни инобатга олган ҳолда, 2029 йилгача бўлган миллий инфратузилма режасида кўзда тутилган лойиҳаларни амалга оширгандан сўнг Қизилўрда-Учқудуқ автомобиль йўли қурилишини кўриб чиқиш тавсия этилади”, – деди у.
