Қизилўрдада шолининг янги серҳосил навлари пайдо бўлади
Қизилўрдада жорий йилда 503 минг тонна шоли йиғиб олинди. Сув етишмаслигига қарамай, шолининг ҳосилдорлиги ўтган йилгидек бўлди. Бу ҳақда вилоят ҳокими Нурлибек Налибаев Астанадаги Марказий коммуникациялар хизматида ўтказилган матбуот анжуманида маълум қилди, деб хабар беради Каzinform.
“Ўрим-йиғим кампанияси якунларига кўра, ҳар гектардан 56,5 центнердан шоли йиғиилди ва омборга 503 минг тонна шоли йиғиб олинди. Сув етишмаслигига қарамай, шолининг ҳосилдорлиги ўтган йилгидек бўлди. Вилоятнинг қишлоқ хўжалиги соҳасида экспорт салоҳияти юксалиб, сотиш бозори кенгаймоқда. Охирги 2 йилда 84 миллион АҚШ долларилик қишлоқ хўжалиги маҳсулотлари экспорт қилинди. Экспорт қилинадиган маҳсулотларнинг 96 фоизи қайта ишланади”, – деди Нурлибек Налибаев.
Унга кўра, сувдан тежамкор фойдаланиш мақсадида томчилатиб ва пуркаш суғориш усулларини қўллаш кўлами кенгайтирилади. Жорий йилда сувни тежаш технологияси асосида 872 гектар майдонга қишлоқ хўжалиги экинлари экилди. Ҳар йили бу тенденцияни ошириш режалаштирилган.
“Вилоятда шоли ва бошқа экинларнинг янги навларини етиштириш, маҳсулот сифатини яхшилаш мақсадида Ибирай Жақаев номидаги Қозоғистон шоличилик илмий-тадқиқот институти фаолиятига устувор аҳамият қаратилмоқда. Яқинда Қишлоқ хўжалиги фанлари академияси билан агросаноат мажмуасини илмий-инновацион ривожлантириш соҳасида ҳамкорлик тўғрисида шартнома имзоланди. Шолининг унумдорлиги юқори, ўсиш даври қисқа бўлган янги навларини жорий этмоқдамиз. Олимлар бир нечта янги навларни синовдан ўтказмоқда. Бу йилги натижа яхши. Тажриба лойиҳасидаги навлар 10 центнердан ортиқ ҳосил бериб, 10-15 кун эрта пишди. Келгуси йилда ҳам бу кўрсаткич сақланиб қолса, 2025 йилдан бошлаб янги навлар фойдаланишга топширилади”, – деди вилоят ҳокими.
Вилоятда экин майдонларини диверсификация қилиш ишлари давом этмоқда. Сувни кам талаб қиладиган экинлар экиш давом этади, мойли экинлар майдонини 13 фоизга, ем-хашак экинларини 8 фоизга, картошка, сабзавот, боғ экинлари майдонини 0,5 фоизга, бошқа экинлар майдонни 21% га орттириш режалаштирилган.
