Қизилўрда вилоятида помидорни қайта ишлайдиган завод қурилади
ASTANA. Kazinform — Қизилўрда вилоятининг Жанақўрғон туманида помидор пастаси ишлаб чиқарадиган корхонани ишга тушириш режалаштирилмоқда, деб хабар беради ҚР Қишлоқ хўжалиги вазирлиги матбуот хизмати.
Матбуот хизмати маълумотларига кўра, «Alpecon Group» компанияси корхонани модернизация қилиш ҳамда қишлоқ хўжалиги маҳсулотларини чуқур қайта ишлашга мўлжалланган замонавий ишлаб чиқариш қувватларини яратиш учун 2,3 миллиард тенге инвестиция киритишни режалаштирмоқда.
Лойиҳа доирасида «ATMO AGRO» МЧЖнинг ишлаб чиқариш объектларини сотиб олиш, технологик ускуналарни янгилаш, ишлаб чиқариш ва ёрдамчи объектларни таъмирлаш, шунингдек, махсус техникалар харид қилиш режалаштирилган. Корхона модернизация қилинганидан сўнг бир суткада 600 тоннагача помидорни қайта ишлаш имкониятига эга бўлади.
Корхонани зарур хомашё билан барқарор таъминлаш мақсадида инвестор помидор етиштириш учун қарийб 2300 гектар суғориладиган ерни ўзлаштиришни режалаштирмоқда. Шунингдек, Туркистон вилоятидаги қишлоқ хўжалиги товар ишлаб чиқарувчиларидан хомашё харид қилиш кўзда тутилган.
Шу тариқа, лойиҳа помидор етиштириш, уни қайта ишлаш ва тайёр маҳсулот ишлаб чиқаришни ягона ишлаб чиқариш тизимига бирлаштириш имконини беради.
“Лойиҳанинг асосий аҳамияти — қишлоқ хўжалиги маҳсулотларини қайта ишлаш ҳажмини ошириш ва уларнинг қўшилган қийматини кўпайтиришдан иборат. Маҳаллий томат пастасини ишлаб чиқариш импорт ўрнини босиш ва Қозоғистонда ишлаб чиқариладиган маҳсулот турларини кўпайтириш имконини беради”, — дейилади хабарда.
