Қирғизистонда рули ўнг томондан чап томонга ўзгартирилган автомобилларни қонунийлаштириш таклиф қилинди
ASTANА. Кazinform — Қирғизистон рули ўнг томондан чап томонга ўзгартирилган транспорт воситаларини қонунийлаштиришга рухсат бериши мумкин, деб хабар беради Кazinformнинг Бишкекдаги мухбири.
Тегишли қонун лойиҳаси жамоатчилик муҳокамасига тақдим этилди.
Ушбу ташаббус хорижий давлат рақамларига эга транспорт воситаларини қонунийлаштиришнинг ҳозирги якуний босқичи доирасида кўриб чиқилмоқда. У 2026 йил 10 июнда бошланади ва 1 сентябрда тугайди.
Ҳозирда Қирғизистонда шахсий мақсадларда фойдаланиладиган 50 га яқин шундай транспорт воситаси мавжуд. Уларни рўйхатдан ўтказиш учун транспорт воситаларини техник баҳолаш ва тегишли хулоса олиш талаб қилинади.
Техник экспертиза Қирғизистон Ички ишлар вазирлиги Йўл ҳаракати хавфсизлиги бош бошқармасининг “Техник мақсадлар маркази” давлат корхонаси томонидан ўтказилади. Экспертиза натижасида транспорт воситаси эгасига унинг техник ҳолати тўғрисида хулоса берилади. Агар транспорт воситаси хавфсизлик талабларига жавоб бермаса, уни рўйхатдан ўтказиш рад этилиши мумкин.
Таъкидлаш жоизки, Қирғизистонда хорижий давлат рақамларига эга транспорт воситаларини қонунийлаштириш бўйича биринчи кенг кўламли кампания 2025 йил 1 апрелдан 1 октабргача бўлиб ўтган эди.
Эслатиб ўтамиз, Қирғизистонда йўл ҳаракати қоидаларини бузганлар учун жазо кучайтирилиши таклиф этилди.
