Қирғизистонда 2024 йил 1 июлдан бошлаб савдо патентлари бекор қилинади
BISHKEK. Kazinform - Қирғизистонда савдо патентлари 2024 йил 1 июлдан бекор қилинади, деб хабар беради Кazinform мухбири.
Қирғизистон Республикаси Давлат солиқ хизмати маълумотларига кўра, мамлакатда савдо патентлари 2024 йил 1 июлгача амал қилади. Шундан сўнг, патент бўйича ишлаётган тадбиркорлар энг қулай солиқ режимига ўтишга таклиф қилинади.
Хусусан, амалдаги солиқ қонунчилиги ва ставкаларига мувофиқ солиқлар умумий асосда тўланадиган умумий солиқ режими, шунингдек, ягона солиққа асосланган соддалаштирилган солиққа тортиш тизими мавжуд. Бунда солиқ ставкалари йиллик товар айланмаси 15 миллион сомгача бўлганлар учун 0 фоиз, 30 миллион сомгача бўлганлар учун 0,5 фоиз, 50 миллион сомгача бўлганлар учун 1 фоиз миқдорида солиқ ставкалари белгиланди.
Бозорлар ва минимаркетлар учун йиллик тушум 100 миллион сомдан ошмаса, ягона солиқ ставкаси 0,1 фоизни ташкил этади. Ягона солиқ тўлови бўйича фаолият юритувчи савдогарлар, стратегик деб таснифланган бозорларда фаолият юритаётганлар бундан мустасно, назорат-касса машиналаридан фойдаланиши ва суғурта бадалларини тўлаши шарт бўлади.
Мамлакат ва Марказий Осиёдаги энг йирик бозорлар “Дордой” ва “Тўратали эл бозори” («Кара-Суу») стратегик объектлар ҳисоблангани боис тадбиркорлар алоҳида солиқ режимига ўтишлари шарт. Ушбу солиқ даромад солиғи, савдо солиғи, ҚҚС ўрнини босади ва товарларни сотишда қўлланилади, актсиз тўланадиган товарлар ва махсус лицензиялар ёки рухсатномалар талаб қилинадиганлар бундан мустасно. Мазкур бозорларнинг сотувчилари алоҳида режим ўрнатилган савдо зоналарида фаолият юритувчи субъектлар ўртасида назорат-касса машиналари, электрон ҳисобварақ-фактуралар ва электрон жўнатмалардан фойдаланишдан озод этилди.
Бундан ташқари, товарлар Қирғизистоннинг қолган ҳудудига сотилган тақдирда, счёт-фактура солиқ қонунчилигига мувофиқ расмийлаштирилиши керак.
Эслатиб ўтамиз, 2023 йил ноябрь ойининг охиридан бошлаб бутун Қирғизистон бўйлаб бозор савдогарларининг митинглари бўлиб ўтди, улар янги солиқ режимига, яъни патентларнинг бутунлай бекор қилинишига қарши чиқдилар. Қирғизистон президенти Садир Жапаров Бишкекдаги йирик “Дордой” бозоридаги савдо нуқталари сотувчилари норозилик митингида савдо фаолияти билан шуғулланувчи тадбиркорлар учун патент тизимини бекор қилишни 2024 йил 1 июлгача кўчиришга қарор қилди.
Муаллиф: Гулмира Абдраҳманова
