Қирғизистон ва Тожикистон авиақатновларини тиклади

Қирғизистон ва Тожикистон 14 мартдан мамлакатлар ўртасида авиақатновларни йўлга қўяди. Бу ҳақда Қирғизистонда давлат ташрифи билан бўлиб турган Тожикистон Республикаси Президенти Эмомали Раҳмон маълум қилди, дея хабар беради Kazinform агентлиги мухбири.

Икки томонлама музокаралар якунларига кўра, Тожикистон президенти Эмомали Раҳмон асосий эътибор транспорт ва коммуникациялар соҳасидаги ҳамкорликни ривожлантиришга қаратилаётганини айтди. Икки давлат ва умуман минтақа иқтисодиётини барқарор ривожлантириш мақсадида Тожикистон ва Қирғизистоннинг транзит-транспорт имкониятларидан ўзаро манфаатли фойдаланиш долзарблиги таъкидланди.

“Икки давлатнинг тегишли идораларига икки давлат ўртасида ҳаво қатнови, шунингдек, автобус йўналишлари, жумладан, чегарадош вилоятлар ўртасида қатновни йўлга қўйиш бўйича амалий чоралар кўриш топширилди. Биз кўрсатмалар бердик. Душанбе – Бишкек, Бишкек – Душанбе ва Бишкек – Хўжанд йўналишлари бўйича парвозларнинг биринчи куни эртага бошланади”, - деди Тожикистон раҳбари.

Аввалроқ Қирғизистон ва Тожикистон ўртасида Давлат чегараси тўғрисидаги шартнома, шунингдек, қатор икки томонлама ҳужжатлар имзолангани хабар қилинган эди.

Эслатиб ўтамиз, 12-13 март кунлари Тожикистон президенти Эмомали Раҳмон давлат ташрифи билан Қирғизистонда бўлиб турибди.