Қирғизистон иқтисодиёти етти ой ичида 11,1% га ўсди
ASTANА. Кazinform – Қирғизистоннинг ялпи ички маҳсулоти (ЯИМ) жорий йилнинг январь-июль ойларида дастлабки ҳисоб-китобларга кўра, 1 триллион 172,7 миллиард сомни (тахминан 13,4 миллиард АҚШ доллари) ташкил этди. Бу ўтган йилнинг шу даврига нисбатан 11,1% га юқори. Бу ҳақда Қирғизистон Миллий статистика қўмитаси хабар берди.
Қўмита маълумотларига кўра, хизмат кўрсатиш соҳаси, товар ишлаб чиқарувчи тармоқлар ва маҳсулотларга соф солиқлар иқтисодий ўсишга ҳисса қўшган.
ЯИМ таркибида хизмат кўрсатиш соҳасининг улуши 49,8% ни, товар ишлаб чиқарувчи тармоқларнинг улуши 34,2% ни ва маҳсулотларга соф солиқларнинг улуши 16% ни ташкил этди.
Ҳисобот даврида саноат ишлаб чиқариш ҳажми 11,2% га ошди. Қурилиш соҳасидаги ўсиш 1,6 баравар, улгуржи ва чакана савдода еса 4% ни ташкил этди.
Қишлоқ хўжалиги, ўрмончилик ва балиқчилик соҳасидаги кўрсаткич 6%га, меҳмонхона ва ресторан хизматлари ҳажми эса 9,3%га ошди.
Жорий йилнинг январь-июнь ойларида Қирғизистоннинг ташқи ва ўзаро савдо ҳажми 7,9 миллиард долларни ташкил этди, бу ўтган йилнинг шу даврига нисбатан 1,4%га кўп.
Савдо ҳажмининг ўсишига импортнинг 3,7%га ўсиши таъсир кўрсатди. Экспорт эса, аксинча, 11,1%га камайди.
Мамлакатнинг умумий савдо айланмасида экспорт улуши 13,5%ни, импорт улуши эса 86,5%ни ташкил этди.
Эслатиб ўтамиз, Қозоғистон ва Қирғизистон ўртасида қишлоқ хўжалиги маҳсулотлари товар айланмаси 41,5 фоизга ошди.
