Келажакда темир йўл соҳасида 27 минг иш ўрни яратилади – Транспорт вазири

ASTANA. Kazinform – ҚР Транспорт вазири Марат Қарабаев Ҳукумат йиғилишида мамлакатда темир йўл лойиҳалари учун қанча иш ўрни зарурлигини айтди.

“Иш билан таъминланган 9 миллион 700 минг аҳолининг 772 минг нафари транспорт соҳасида меҳнат қилади. Уларнинг аксарияти темир йўл, автомобиль транспорти ва логистика соҳасида меҳнат қилади. Келажакда бу кўрсаткич фақат ошади. Келгусида темир йўл тармоғида 27 минг иш ўрни яратиш, жумладан, “Бақти – Аяғоз”, “Дарбаза – Мақтаарал”, “Дўстлик – Мўйинти” темир йўл линиялари ва “Алмати вокзалини айланма йўли” қурилиши режалаштирилган”, – деди у.

Марат Қарабаевнинг сўзларига кўра, автомобиль йўллари соҳасида 24 та лойиҳанинг амалга оширилиши натижасида 26 минг иш ўрни яратилади.

“Логистика, фуқаро авиацияси ва денгиз транспортида лойиҳаларни амалга ошириш натижасида 22 мингта иш ўрни таъминланади. Умуман олганда, транспорт соҳасида 118 та лойиҳанинг амалга оширилиши 2030 йилгача қўшимча 75 минг иш ўрни яратиш имконини беради”, — деди вазир.