Келгуси йилдан бошлаб Ўзбекистонда букмекерлик идоралари фаолиятига рухсат берилади

TASHKENT. Kazinform – Ўзбекистон Президенти Шавкат Мирзиёев “Таваккалчилик асосидаги лотереялар ва ўйинлар фаолиятини тартибга солишни такомиллаштириш чора-тадбирлари тўғрисида”ги қарорни имзолади, деб хабар беради Kazinform агентлигининг Тошкентдаги мухбири Алихан Асқар.

Ҳужжатга кўра, 2025 йил 1 январдан бошлаб Истиқболли лойиҳалар миллий агентлигидан лицензия олган шахсларга букмекерлик фаолиятини ташкил этишга рухсат берилади.

Ушбу агентлик онлайн ўйинлар, букмекерлик хизматлари ва лотереяларни тартибга солувчи ва лицензияловчи ваколатли давлат органи сифатида белгиланган. Берилган лицензия асосида ташкил этиладиган букмекерлик гаровлари, онлайн ўйинлар ва лотереяларда фақат ўзбекистонлик ва 18 ёшдан ошган хорижликлар иштирок этиши мумкин.

“2025 йил 1 январдан бошлаб 5 йил муддатга онлайн-ўйинлар, лотереялар ва букмекерлар ташкил этувчи юридик шахслар барча тўланган ютуқлар ва қайтарилган гаровлар чегириб ташланганидан кейин жами даромадининг 4 фоизи миқдорида солиқ тўлайди”, – дейилади ҳужжатда.

Шу билан бирга, букмекерлик идораларида пул тикувчи жисмоний шахсларнинг даромадлари солиққа тортилмайди. Истиқболли лойиҳалар миллий агентлигидан маълум қилишларича, мазкур чора-тадбирлар фуқароларнинг ҳуқуқ ва манфаатларини ҳимоя қилиш, қимор ўйинларига қарамликнинг олдини олиш ва унга қарши курашиш, республикадан маблағларнинг чиқиб кетишини тўхтатишга қаратилган.