Қатар-2022: Аргентина пенальтилар сериясида Францияни мағлуб этиб, учинчи бор жаҳон чемпиони бўлди

ASTANА. Кazinform – Қатарда бўлиб ўтаётган футбол бўйича жаҳон чемпионати финал босқичида Аргентина ва Франция терма жамоалари олтин медал учун баҳслашди, деб хабар беради Kazinform мухбири.

Бунгача Аргентина ва Франция икки марта жаҳон чемпионлигини қўлга киритган.

Бу икки жамоа мундиалда уч марта тўқнаш келган ва Аргентина иккитасида ғалаба қозонган (1930 йилда – 1:0, 1978 йилда – 2:1). Марадона бошчилигидаги аргентиналиклар 1978 йилда ўз мамлакатларида ўтказилган чемпионликни қўлга киритдилар.

Бундан тўрт йил аввал Россияда 1/8 финалда Франция Аргентинани 4:3 ҳисобида мағлуб этган, Килиан Мбаппе иккита гол урган, Лионель Месси эса алоҳида ажралиб турмаганди.

Бу йилги чемпионатда бештадан гол урган ва мерганлар бўйича етакчи бўлган Месси ва Мбаппе финал учрашувида энг зўр бўлиш учун бор кучларини ишга солишлари аниқ эди. Айниқса, бу Мессининг сўнгги жаҳон чемпионати бўлгани учун.

Бу сафар 21-дақиқада чап қанотдан жарима майдончасига кириб келган Анхел Ди Марияни Усмон Дембеле йиқитди. 23-дақиқада Лионель Месси 11 метрлик пенальтини аъло даражада бажариб, Аргентинани олдинга олиб чиқди - 1:0.

Кейин 36-дақиқада МакАллистер тўпни Ди Марияга узатди. Ди Мария хато қилмади - 2:0.

Иккинчи бўлимда 79-дақиқада аргентиналик Николас Отаменди Рандал Коло Муанига нисбатан қўполлик ишлатди. Килиан Мбаппе 80-дақиқада пенальтини амалга оширди. Коло Муанининг узатмасини қабул қилиб олган Мбаппе ҳисобни тенглаштиришга муваффақ бўлди - 2:2. 90+7-дақиқада Мессининг хавфли зарбасини Уго Ллорис қайтарди.

Икки қўшимча вақтнинг 109-дақиқасида Месси У.Ллорисга тўп киритди - 3:2. Бироқ 118-дақиқада К.Мбаппе пенальтидан тўпни яна дарвозага жойлаб қўйди - 3:3. Бу Килианнинг финалда хет-трик қайд этган ушбу чемпионатдаги 8-голи бўлди. У чемпионатнинг энг яхши тўпурарига айланди.

Пенальтилар сериясида Францияни 4:2 ҳисобида мағлуб этган Аргентина ўз тарихида учинчи бор жаҳон чемпиони бўлди.

Муаллиф: Ғайсағали Сейтақ