Каспий қувурлари консорциуми Қозоғистон нефт экспортининг асосий йўналиши бўлиб қолаверади

NUR-SULTAN. Kazinform – Қозоғистон Энергетика вазири Болат Ақшолақов Қозоғистоннинг Озарбайжон орқали нефт экспорти келажаги ҳақида ўз фикрини билдирди, дея хабар бермоқда Kazinform.

«Биз нефт экспортининг муқобил йўллари ҳақида ҳар сафар сўрашганида гаплашамиз. Бугунги кунда Каспий қувурлари консорциуми Қозоғистон нефтини экспорт қилишнинг оқилона йўлидир. Яъни, асосий вазифа - бу йўналишнинг узлуксиз ишлашини таъминлаш ва Қозоғистон нефтини экспорт қилиш учун барқарор канални сақлаш. Бу мамлакат иқтисодиёти юксалиши учун жуда муҳим»

, — деди вазир.

Шунингдек, у Озарбайжондан ўтадиган йўналиш Каспий қувурлари консорциумига муқобил сифатида қаралмаслигини айтди.

«Яқин икки йилда йирик конлар ҳисобига, янги кичик конларни топиб, фойдаланишга топшириш ҳисобига нефт қазиб олиш ҳажмини оширмоқчимиз. Демак, бу йилги режада нефт қазиб олиш ҳажмини 85,7 миллион тоннага етказиш кўзда тутилган бўлса, келгусида бу кўрсаткич 103 миллион ёки ҳатто 107 миллион тоннага етиши мумкинлиги тахмин қилинмоқда. Бу биз ҳозир экспорт қилаётган нефтдан анча кўп. Кейин ортиб бораётган ҳажмни жўнатиш, уни узлуксиз узатишни бошқаришнинг қўшимча усуллари ҳақида ўйлашимиз керак. Шунинг учун биз бошқа муқобил йўналишларни кўриб чиқмоқдамиз»

, - деб тушунтирди вазир.

Унинг сўзларига кўра, Қозоғистон нефтини Каспий денгизи орқали ташишнинг иккита муқобил йўли мавжуд.

«Озарбайжон ҳам, Эрон ҳам бу йўналиш бўйича ҳамкорликни таклиф қилиши мумкин. Ҳар бир маршрут ўзига хос хусусиятларга эга. Эронга келсак, ҳали бекор қилинмаган санкциялар масаласи бор. Шунга қарамай, биз бу йўналишни кўриб чиқамиз. Айтиш мумкинки, экспорт қилинадиган нефтнинг бир қисмини Каспий орқали Озарбайжонга жўнатиш техник муаммодир. Бу эрда катта ҳажм ҳақида ҳам гап йўқ. У ортиши мумкин бўлган ҳажмларни жўнатиш учун мўлжалланган. Шу боис, Каспий қувурлари консорциумининг узлуксиз ишлаши устувор вазифа бўлиб қолмоқда. Бундан ташқари, қўшимча параллел йўналишлар ишга туширилади. Бу нефт қазиб олиш ҳажмининг ошиши ҳисобига амалга оширилади»

, — деди Болат Ақшолақов.

Фото: gov.kz