Қасим-Жомарт Тоқаев ва Сердар Бердимуҳамедов кичик гуруҳда музокаралар олиб боришди
ASTANA. Kazinform – Кичик гуруҳ музокаралари олдидан “Ўғизхон” саройида Қозоғистон Президентини кутиб олиш маросими бўлиб ўтди. Давлат раҳбарлари расмий делегация аъзоларини бир-бирига таништирди, деб хабар беради Ақорда матбуот хизмати.
Қасим-Жомарт Тоқаев бундай юксак даражадаги мунтазам учрашувлар биродар икки давлат ўртасидаги стратегик ҳамкорликни мустаҳкамлашда муҳим аҳамият касб этишини таъкидлади.
“Туркманистон биз учун қардош давлат ва стратегик ҳамкор. Қозоғистон энергетика, транспорт, логистика ва маданий-гуманитар соҳалардаги ҳамкорликка оид барча масалаларда мамлакатингиз билан ишончли иттифоқчи ҳисобланади. Келажакда ҳам бу йўналишда давом этишини алоҳида таъкидламоқчиман. Албатта, биз Туркманистоннинг халқаро майдондаги бетарафлигини ҳурмат қиламиз. Мамлакатингиз минтақавий ва халқаро хавфсизликка катта ҳисса қўшмоқда. Шу билан бирга, биз БМТ ва бошқа халқаро ташкилотлар доирасида яқин муносабатлар ўрнатишга тайёрмиз”, – деди ҚР Президенти.
Сердар Бердимуҳамедов Туркманистон қардош Қозоғистон билан стратегик шерикликни ҳар томонлама ривожлантириш тарафдори эканини тасдиқлади.
“Биз Қозоғистонга Туркманистоннинг ташқи сиёсатдаги бетараф йўналишини, шунингдек, БМТ ва бошқа глобал тузилмалар доирасидаги халқаро ташаббусларини қўллаб-қувватлаётгани учун ўз миннатдорчилигимизни билдирамиз. Туркманистон эса Қозоғистон Республикасининг ташқи сиёсий позициясини олқишлайди. Биз мамлакатларимиз ўртасидаги савдо-иқтисодий алоқаларни ривожлантиришга ҳам алоҳида эътибор қаратамиз. Биз энергетика, транспорт, савдо, қишлоқ хўжалиги, юқори технологиялар каби муҳим соҳаларда ҳамкорлик қилиш ниятидамиз. Икки давлат ўртасидаги маданий-гуманитар алоқалар ҳам жуда муҳим”, – деди Туркманистон президенти.
Учрашувда томонлар Қозоғистон ва Туркманистон ўртасидаги дўстона муносабатларни янада мустаҳкамлашга қатъий эканликларини билдирдилар.
