Қасим-Жомарт Тоқаев ва Илҳом Алиев ОАВ вакиллари учун брифинг ўтказди

ASTANА. Кazinform - Президент Озарбайжонни Қозоғистоннинг стратегик ҳамкори сифатида қайд этиб, қардош давлатга ташрифи муҳимлигини таъкидлади.

– Ушбу давлат ташрифи мамлакатларимиз ўртасидаги ҳамкорликни янада ривожлантириш нуқтаи назаридан жуда муҳим. Мен билан катта делегация келди. Демак, биз қардош Озарбайжон давлатига режалаштирилган ушбу давлат ташрифига пухта тайёргарлик кўрганмиз. Бугун биз тегишли ҳужжатлар ва келишувларни имзолаш маросимида иштирок этдик. Асосийси, келишувга кўра, икки мамлакат ҳукуматлари ва бошқа тармоқ идоралари олий даражадаги учрашувларда эришилган келишувларни тўлиқ амалга ошириш учун барча саъй-ҳаракатларини амалга оширади, - деди Қозоғистон Президенти.

Давлат раҳбари Қозоғистон ва Озарбайжон ҳамкорлиги дўстлик, ишонч, ҳурмат ва бир-бирининг манфаатларини ҳисобга олишга асосланган давлатлараро муносабатларнинг илғор намунаси сифатида қаралишини таъкидлади. Қасим-Жомарт Тоқаевнинг таъкидлашича, олий даражадаги барча алоқалар икки давлат ўртасидаги стратегик шериклик ва иттифоқчилик муносабатларини мустаҳкамлаш учун жуда фойдали. Президент Олий давлатлараро кенгашнинг биринчи йиғилишида муҳокама қилинган масалаларнинг аҳамиятига эътибор қаратди.

– Бугун биз ресурслардан ташқари транспорт ва логистика соҳасидаги имкониятлардан фойдаланиш учун рақобат кучайиб бораётгани ҳақида гаплашдик. Бу стратегик ҳудуддир. Қозоғистон ҳам, Озарбайжон ҳам ишончли шериклар сифатида бу йўналишда яқин алоқаларни давом эттираётгани қувонарлидир. Қозоғистон ҳудуди орқали Сиань портидан Озарбайжонга темир йўлнинг очилиши кўп нарсани англатади. Бу, аслида, жуда муҳим чора ҳисобланади. Биз рақамлаштириш, сунъий интеллект тизимини яратиш, Каспий денгизи туби бўйлаб оптик толали алоқа тармоғини ётқизиш йўналишларидаги саъй-ҳаракатларни бирлаштириш масалаларини муҳокама қилдик. Буларнинг барчаси ноёб лойиҳалардир, - деди Президент.

Қасим-Жомарт Тоқаев маданий-гуманитар ҳамкорлик масалаларига алоҳида тўхталди. Озарбайжон томонига Қозоғистон маданият кунларини юқори савияда ўтказгани учун ўз миннатдорчилигини билдирди.

– Озарбайжон маданияти вакилларини юртимизда интиқлик билан кутамиз. Ушбу тадбир муваффақиятли ўтишига шубҳа йўқ. Чунки Озарбайжон маданиятига қизиқиш доимо юқори. Очиғини айтганда, Қозоғистон халқи мамлакатингиз маданиятини жуда яхши кўради. Озарбайжон санъаткорларини қучоқ очиб кутиб оламиз, - деди Давлат раҳбари.

Қозоғистон Президенти кўп томонлама тузилмалар доирасидаги ҳамкорликни мустаҳкамлаш муҳимлигини таъкидлади.

– БМТ, ТДТ, ЕХҲТ, ОҲИЧК, СПЕКА, МДҲ каби муҳим халқаро ташкилотлар доирасидаги ҳамкорлигимизни алоҳида таъкидламоқчиман. Назаримда, бу муносабатлар кўлами кенг ва халқаро миқёсдаги ҳамкорлигимиз давом этади. Стратегик шериклик нуқтаи назаридан бу ҳам жуда муҳим, – деди Қасим-Жомарт Тоқаев.

Озарбайжон Президенти Илҳом Алиев Қасим-Жомарт Тоқаевга давлат ташрифи учун миннатдорлик билдириб, музокаралар натижаларидан мамнунлигини билдирди.

– Транскаспий транспорт йўлаги минтақавий ҳамкорлик даражасини белгиловчи аниқ йўналишдир. Чунки қўшни давлатлар билан яхши муносабатлар ўрнатмасдан туриб, транзит давлатга айланиб бўлмайди. Айни пайтда Қозоғистон ҳам, Озарбайжон ҳам минтақавий ҳамкорлик ва қўшнилари билан муносабатларни мустаҳкамлаш тарафдоридир. Бизни фақат Каспий денгизи ажратиб туради. Бироқ, бугунги кунда бу тўсиқ эмас. Аксинча, Каспий денгизи нафақат мамлакатларимизни, балки кўплаб давлатларни боғловчи кўприк саналади. Чунки Транскаспий транспорт йўналиши ўз имкониятларини тўлиқ очиб бера бошлади. Бугун Ҳукумат аъзолари кўплаб масалалар юзасидан атрофлича маъруза қилди. Ўзаро ҳамкорлик ва қўшма ҳаракатлар натижалари, энг муҳими, келажакдаги режаларимиз ҳақиқатда жуда кенг, - деди Илҳом Алиев.