Қасим-Жомарт Тоқаев ва Фридрих Мерц ОАВ вакилларига қўшма баёнот берди
ASTANA. Kazinform — Давлат раҳбари икки мамлакат ўртасидаги алоқаларни янада мустаҳкамлаш учун йўл очишига ишонч билдирди ва ушбу ташрифга алоҳида аҳамият қаратишини таъкидлади. Бу ҳақда Ақорда матбуот хизмати хабар берди.
“Германия – сиёсий таъсири катта, салоҳияти юксак ва халқаро нуфузи юқори давлат. Иқтисодиёт, илм-фан, технология ва бошқа соҳалардаги улкан ютуқларингиз - бунинг яққол далилидир. Фурсатдан фойдаланиб, ҳурматли Канцлер жаноблари, Сизни ва барча ватандошларингизни яқинлашиб келаётган Германия Бирлиги куни билан чин қалбимдан табриклайман! Бу Германияни тараққиётнинг янги даврига бошлаган, бутун Европанинг ўсиши ва равнақига янги туртки берган тарихий кун экани шубҳасиз. Дўстона Германия халқининг бундан кейин ҳам гуллаб-яшнаши учун самимий тилакларимни билдираман”, – деди Қасим-Жомарт Тоқаев.
Президент Германияни Қозоғистоннинг Европадаги ишончли стратегик ҳамкори, шунингдек, мамлакатимиз мустақиллигини биринчи бўлиб тан олган давлатлардан бири сифатида эътироф этди.
“Келаси йили икки давлат ўртасида дипломатик муносабатлар ўрнатилганига 35 йил тўлади. Шундан буён ҳамкорлигимиз барча даражаларда изчил ривожланиб келади. Жумладан, савдо-иқтисодий, инвестициявий ва маданий-гуманитар соҳалардаги алоқаларимиз мустаҳкамланди. Тегишли шартномавий-ҳуқуқий база шакллантирилди. Халқаро ташкилотлар доирасидаги ҳамкорлигимиз ҳам кенгайди. Ўзаро ҳурмат ва қўллаб-қувватлашга асосланган ҳамкорлигимиз келгусида ҳам муваффақиятли давом этишига ишонаман”, – деди Қасим-Жомарт Тоқаев.
Эслатиб ўтамиз, Қасим-Жомарт Тоқаев Германияга расмий ташриф билан борди. Шунингдек, Қасим-Жомарт Тоқаев ва Франк-Вальтер Штайнмайер Қўшма декларация қабул қилдилар. Президент Қасим-Жомарт Тоқаев Канцлер Фридрих Мерц билан музокаралар ҳам ўтказди.
