Қасим-Жомарт Тоқаев Того Президентига: Ҳозирги мураккаб халқаро вазиятда кучларни бирлаштириш зарур

Давлат раҳбари Қасим-Жомарт Тоқаев Ақордада Қозоғистонга расмий ташриф билан келган Того Республикаси Президенти билан музокаралар ўтказди. Бу ҳақда Kazinform Ақорда матбуот хизматига таяниб хабар беради.

Қасим-Жомарт Тоқаев Фор Гнассингбега эҳтиром кўрсатди ва унинг Қозоғистонга тарихий ташрифи икки томонлама муносабатларнинг янги босқичига йўл очишини таъкидлади.

“Қозоғистон мамлакатингиз билан ҳар томонлама ҳамкорликни ривожлантиришдан манфаатдор. Аввалги норасмий музокараларда биз Қозоғистон ва Того ўртасидаги ҳамкорликнинг ўзаро манфаатли имкониятларини муҳокама қилган эдик. Албатта, мамлакатларимиз турли қитъаларда, турли минтақаларда жойлашган. Аммо биз ҳозирги мураккаб халқаро вазиятда кучларни бирлаштиришимиз керак. Бу борада Қозоғистон ва Того, шунингдек, бошқа давлатлар ҳам халқаро муносабатларни нормаллаштириш учун бирлашиши керак”, — деди Президент.

Учрашувда Давлат раҳбари Қозоғистон ва Того келгусида ишлаши мумкин бўлган асосий йўналишларни белгилаб олди. Қасим-Жомарт Тоқаевнинг сўзларига кўра, икки томонлама ва халқаро кун тартибини илгари суриш учун доимий мулоқотни йўлга қўйиш зарур.

Того Республикаси Президенти Фор Эссозимна Гнассингбе Давлат раҳбари Қасим-Жомарт Тоқаевнинг таклифига биноан 27-28 ноябрь кунлари расмий ташриф билан Қозоғистонда бўлиши ҳақида аввалроқ хабар берган эдик. Бугун Қозоғистон Республикаси Президенти Фор Эссозимна Гнассингбени Ақордада кутиб олди.

Қозоғистон Президенти маслаҳатчиси – Матбуот котиби Берик Уалиули ушбу ташрифнинг мазмуни ва аҳамияти ҳақида гапирди.

Kazinform мухбири интернетда Того Республикаси тарихи ва унинг президентига оид маълумотларни кўриб чиқди.