Қасим-Жомарт Тоқаев теннисчи Елена Рибакинани қабул қилди
Қозоғистон Президенти Уимблдон ғолиби Елена Рибакинани Индиан-Уэллс ва Маямидаги Австралия очиқ чемпионатидаги ёрқин ўйинлари билан табриклаб, маҳорати ва ғалабага бўлган букилмас иродаси учун миннатдорчилик билдирди.
Давлат раҳбари Қозоғистон тенниси вакилларининг муваффақияти ушбу спорт турини ёш авлод ўртасида оммалаштиришга хизмат қилаётганини таъкидлади.
Ўз навбатида, Елена Рибакина ғалабалар чоғида кўрсатган қўллаб-қувватлаши ва самимий табриклари учун Президентга миннатдорлик билдирди. У нуфузли халқаро мусобақаларда муваффақият қозониш учун бор куч-ғайратини ишга солишини айтди.
Давлат раҳбари Қасим-Жомарт Тоқаев бугунги кунда мамлакатда 30 мингдан ортиқ киши теннис билан шуғулланаётганини таъкидлади. Уларнинг 10 мингдан ортиғи 10 ёшгача бўлган болалардир. Ушбу спорт турини оммалаштириш мақсадида мамлакатнинг 17 вилоятида теннис кортлари қурилди. Шунингдек, Baby tennis ва «10 ёшгача теннис» каби лойиҳалар муваффақиятли амалга оширилмоқда.
14-15 апрель кунлари Астанада илк бор Билли Жин Кинг Кубоги саралаш баҳси бўлиб ўтади. Теннис бўйича Қозоғистон аёллар терма жамоаси Польша жамоасига қарши баҳс олиб боради. Ушбу баҳсда ғолиб чиққан жамоа жаҳон чемпионатига йўлланмани қўлга киритади.
Давлат раҳбари бундай тадбирларнинг халқаро миқёсда ташкил этилиши мамлакатда теннис ривожига янги суръат бағишлашини таъкидлади. Шунингдек, Парижда бўлиб ўтадиган ёзги Олимпия ўйинларига лицензия қўлга киритган мамлакат теннисчиларига муваффақиятлар тилади.
Фото: akorda.kz
