Қасим-Жомарт Тоқаев Мўғулистонга боради
ASTANA. Kazinform – Қасим-Жомарт Тоқаев Мўғулистон Президенти Ухнаагийн Хурэлсух билан учрашди. Қозоғистон Президенти Ухнаагийн Хурэлсухга “ШҲТ Плюс” форматидаги учрашувни муваффақиятли ўтказишга қўшган конструктив ҳиссаси учун миннатдорлик билдирди.
Давлат раҳбарининг таъкидлашича, Мўғулистон Қозоғистоннинг Осиёдаги энг муҳим ҳамкорларидан биридир.
Икки давлатни асрлар давомида умумий маданий ва тарихий қадриятлар ва анъаналар боғлаб туради.
“Қозоғистон ва Мўғулистон ўртасидаги ҳамкорлик ўзаро ҳурмат ва қўллаб-қувватлаш руҳида муттасил мустаҳкамланиб бормоқда. Мамлакатларимиз ўртасида ишончли ва конструктив сиёсий мулоқот ўрнатилди. Кенг кўламли шартнома-ҳуқуқий база яратилди, маданий-гуманитар алоқалар кенгаймоқда. Ушбу қулай фурсатдан фойдаланиб, Қозоғистондаги мисли кўрилмаган сув тошқини пайтида қўллаб-қувватлаганингиз учун сизга ва бутун мўғул халқига ўз миннатдорчилигимни билдираман”, – деди Қасим-Жомарт Тоқаев.
Учрашувда савдо-иқтисодий ҳамкорлик истиқболлари, товар айирбошлаш ҳажмини ошириш, транспорт-транзит салоҳиятини ошириш масалалари муҳокама қилинди.
Президентнинг фикрича, мавжуд имкониятлардан тўлиқ фойдаланиш учун икки давлат ҳукуматлари савдо-иқтисодий ҳамкорликнинг янги йўналишларини излашлари керак.
“Қозоғистоннинг Мўғулистонга нохом ашё экспорт қилиш салоҳияти 100 миллион долларга яқин. Шу муносабат билан айланмани 500 миллион долларга етказиш бўйича аниқ мақсад қўйишни тавсия этаман. Шу билан бирга, биз Қозоғистон-Мўғулистон ишбилармонлар кенгашини ташкил этиш, савдо-иқтисодий ҳамкорликни жонлантириш бўйича йўл харитасини қабул қилишдан манфаатдормиз”, – деди Президент.
Қасим-Жомарт Тоқаев Қозоғистон ва Мўғулистон ўртасида ҳаво қатновларини кўпайтириш зарурлигини айтди.
У, шунингдек, икки давлат ўртасида йўл вақтини сезиларли даражада қисқартирувчи автомобиль йўлини қуриш имкониятларини кўриб чиқишга чақирди.
Мўғулистон Президенти Қозоғистонда амалга оширилаётган сиёсий ва ижтимоий-иқтисодий ислоҳотлар натижаларини юқори баҳолади.
Шунингдек, у Астананинг халқаро майдондаги роли тобора кучайиб бораётганини қайд этди. Унинг сўзларига кўра, икки давлат умумий қадриятлар ва тарихий илдизларга асосланган кўп томонлама ҳамкорликни ривожлантириши керак.
Ухнаагийн Хурэлсух Қасим-Жомарт Тоқаевни Мўғулистонга давлат ташрифи билан келишни таклиф қилди.
Қозоғистон Президенти бу таклифни мамнуният билан қабул қилишини айтди. Унинг сўзларига кўра, бўлажак ташриф икки томонлама муносабатлар йилномасида янги даврга йўл очади.
Бундан ташқари, икки давлат раҳбарлари кўп томонлама тузилмалар доирасидаги ҳамкорлик масалалари юзасидан фикр алмашдилар.
