Қасим-Жомарт Тоқаев ҚР Ҳукуматига 2 йил ичида сунъий интеллектга ихтисослашган маълумотлар марказларини қуришни топширди
2024 йилда Миллий сунъий интеллект платформасини ишга туширган маъқул. Бу ҳақда ҚР Президенти Қасим-Жомарт Тоқаев «Digital Bridge 2023» халқаро технология форумида маълум қилди, деб хабар беради Каzinform агентлиги.
“Рақамли инфратузилмани тизимли ривожлантириш муҳим аҳамиятга эга. Илғор IT инфратузилмаси рақамли саноатда келажакдаги тараққиёт, хусусан, сунъий интеллектни ривожлантириш учун асос яратади. Шунинг учун инфратузилмани ишлаб чиқишда IT маҳсулот ишлаб чиқувчиларнинг эҳтиёжлари ҳар доим ҳисобга олиниши керак. Аввало, ҳисоблаш марказларининг қувватини оширишимиз керак. Ҳукуматга икки йил ичида сунъий интеллектга ихтисослашган маълумотлар марказларини қуришни топшираман”, – деди Президент.
Давлат раҳбари бу ишга дунёга машҳур Amazon, Google, Mastercard ва Citigroup каби компаниялар жалб этилиши мумкинлигини айтди.
“Яқинда Нью-Йорк шаҳрига сафарим давомида ушбу компаниялар раҳбарлари билан учрашдим. Тегишли келишувларга эришдик. Сунъий интеллект учун маълумотлар экотизимини ишлаб чиқиш ҳам муҳимдир. Аслида, сунъий интеллектга кераги ва ҳаракатлантирувчи кучи – катта маълумотлар базасидир. Қозоғистонда бу борада турли қарорлар қабул қилинган. Бироқ, давлат органлари томонидан тўпланган маълумотлар базасидан фойдаланиш имконияти чекланганлиги сабабли унинг имкониятларидан ҳали тўлиқ фойдаланилмаяпти. Бу ерда ахборотнинг “ошкора презумпцияси”га амал қилиш керак”, – деди Қасим-Жомарт Тоқаев.
Президент Smart Data Ukimet орқали аноним маълумотларга бепул киришни таъминлаш зарурлигини таъкидлади.
“Мен бу ерда айтмоқчиманки, барча маълумотлар аноним ва хавфсиз ҳимояланган бўлиши керак. Шахсий маълумотларни тарқатиш билан боғлиқ барча хавфларни бартараф этиш керак. Қолаверса, келаси йилдан бошлаб Миллий сунъий интеллект платформасини ишга туширган маъқул. Бу ташаббус давлат ва йирик бизнес маълумотларини бирлаштириб, уларнинг долзарблиги ва мавжудлигини таъминлаши керак”, – деди Давлат раҳбари.
