Қасим-Жомарт Тоқаев конголик ёшларга Қозоғистон олий ўқув юртларида ўқишни таклиф қилди
ASTANA. Kazinform – Астана ва Браззавиль ўртасида маданий-гуманитар алоқаларни ўрнатиш жуда муҳим. Бу ҳақда Давлат раҳбари Қасим-Жомарт Тоқаев Конго Республикаси Президенти Дени Сассо-Нгессо билан Ақордада бўлиб ўтган музокаралар якунлари бўйича матбуот анжуманида маълум қилди.
“Астана ва Браззавиль ўртасида маданий-гуманитар алоқаларни ўрнатиш жуда муҳим. Конголик ёшларга Қозоғистон олий ўқув юртларида ўқишни таклиф қилдим. Бу қадам ҳамкорликни мустаҳкамлаши шубҳасиз”, – деди Қасим-Жомарт Тоқаев.
Президент икки давлат ўртасида халқаро ва минтақавий даражада яқин муносабатлар ўрнатилганини алоҳида таъкидлади.
“Бизнинг кўплаб долзарб масалалар бўйича умумий позициямиз бор. Ҳамкорлигимиз глобал ва минтақавий тузилмалар доирасида ривожланиб бормоқда. Ҳозирги геосиёсий вазиятда БМТ ва Африка Иттифоқи доирасида ўзаро ёрдам ва маслаҳатлашувлар ўтказиш жуда муҳим. Шунингдек, глобал ва минтақавий хавфсизлик бўйича фикр алмашдик. Иқлим ўзгариши бугунги куннинг энг долзарб муаммоларидан биридир. Биз бу таҳдидга қарши биргаликда курашишга, яқиндан ишлашга келишиб олдик”, – деди Давлат раҳбари.
Қасим-Жомарт Тоқаев Конго раҳбарининг бутун дунё бўйлаб ўрмонлар барпо этиш ва ўрмонларни қайта тиклашнинг 10 йиллигини эълон қилиш ташаббусини қўллаб-қувватлашини билдирди.
“Аслида, жаноб Сассу-Нгессонинг мамлакатимизга ташрифи тарихий аҳамиятга эга. Бу ташриф Қозоғистон ва Конго ўртасидаги муносабатларга янги суръат бағишлайди, деб ўйлайман. Шу билан бирга, Марказий Осиё ва Африка ўртасидаги ҳамкорликни мустаҳкамлашга ҳам ҳисса қўшиши шубҳасиз. Ишонаманки, биз бир-биримизни қўллаб-қувватлаймиз ва биргаликда муваффақиятларга эришамиз. Икки давлат ўртасидаги дўстлик мустаҳкамланиб бораверсин”, – деди Президент.
