Қасим-Жомарт Тоқаев Хива шаҳрининг тарихий жойларига ташриф буюрди
ASTANA. Kazinform – Қасим-Жомарт Тоқаев Ўзбекистонга амалий ташрифи доирасида Президент Шавкат Мирзиёев билан биргаликда қадимий Хива шаҳрининг тарихий марказидаги “Ичан-қалъа” шаҳарчасига ташриф буюрди, деб хабар беради Ақорда матбуот хизмати.
“Ичан-қалъа” Марказий Осиёдан ЮНЕСКОнинг Бутунжаҳон мероси рўйхатига киритилган биринчи ёдгорликдир. Давлат тарихий-археология музей-қўриқхонасида 400 га яқин турар-жой бинолари, олтмишга яқин тарихий-меъморий ёдгорликлар жойлашган.
Давлат раҳбарларининг шаҳарга ташрифи “Ота дарвоза” дарвозасидан бошланди. Олий мартабали меҳмон шарафига ўзбек халқининг куй-қўшиқлари янгради, театрлаштирилган томоша намойиш этилди.
Сўнгра “Куня Арк” мажмуаси, Шерғозихон мадрасаси, Муҳаммад Амин Иноқ мадрасаси, Жума масжиди ва “Тош ҳовли” мажмуасида бўлди.
Қозоғистон ва Ўзбекистон президентлари Хивалик ўрта аср шоири, маърифатпарвар, сўфий ва мутафаккири Паҳлавон Маҳмуд (1247-1326) мақбарасини зиёрат қилиб, унинг руҳига Қуръон бағишлади. Паҳлавон Маҳмуд мақбараси ўзбек, туркман, қорақалпоқ ва бошқа халқлар зиёрат учун борадиган муқаддас жой саналади.
