Қасим-Жомарт Тоқаев «HIVA GILAMLARI» гилам тўқиш фабрикасига ташриф буюрди
ASTANA. Kazinform – Қасим-Жомарт Тоқаев Хивага амалий ташрифи доирасида Президент Шавкат Мирзиёев билан бирга Ўзбекистон енгил саноатининг намунали корхоналаридан бири саналган «HIVA GILAMLARI» гилам тўқиш фабрикасини бориб кўрди.


1977 йилда ташкил этилган корхона янги инвестор томонидан тўлиқ реконструкция қилинган. Йилига 4,2 миллион квадрат метр гилам тўқийдиган тўртта цех мавжуд.
Давлат раҳбарларига акрил ип-калава ишлаб чиқариш цехи, гиламдўзлик цехлари ва тайёр гилам намуналари кўргазмаси намойиш этилди.

Корхона директори Камол Абдуллаевнинг айтишича, корхона гиламлари ички бозорга сотилиши билан бирга МДҲ, ХХР ва АҚШга экспорт қилинмоқда.
Шундан сўнг президентлар Ўзбекистон саноат товарлари кўргазмасини бориб кўрдилар. Павильонларда махсус жиҳозлар, электр техника воситалари намуналари, боғдорчилик, тўқимачилик, кимё, озиқ-овқат, фармацевтика ютуқлари, ипак, чарм, заргарлик буюмлари намойиш этилмоқда.

Президентлар чегарадош ҳудудларда экспортга йўналтирилган корхоналар кластерини яратиш муҳимлигини таъкидладилар.
Шу билан бирга, давлат раҳбарлари Орол денгизи тубига саксовул экиш, минтақадаги экологик вазиятни яхшилаш бўйича биргаликдаги саъй-ҳаракатларни амалга ошириш зарурлигига эътибор қаратдилар.
Бунгача ҚР Президенти Ўзбекистонга амалий ташриф билан борганини ёзган эдик.