Қасим-Жомарт Тоқаев: Аёллар улуғланадиган жамиятнигина маданиятли дейиш мумкин
Қозоғистон Республикаси Президенти Қасим-Жомарт Тоқаев Халқаро хотин-қизлар кунига бағишланган тантанали тадбирда иштирок этди, деб хабар беради Каzinform агентлиги Ақорда матбуот хизматига таяниб.

Давлат раҳбари ўз нутқида аёлларни кириб келаётган байрам билан табриклади.
“8 март баҳор байрами бўлиб, гўзаллик, эзгулик ва илиқлик рамзидир. Биз эркаклар сизни қадрлаймиз, ҳурмат қиламиз ва севамиз. Хотин-қизларимизга доимо алоҳида эътибор қаратилади. Аёллар эъзозланган жамиятнигина маданиятли дейиш мумкин. Доно халқимиз азалдан оналарни эъзозлаб, қизларига ғамхўрлик қилган. Бундай муносабат азал-азалдан қонимизга сингиб кетган”, – деди Қасим-Жомарт Тоқаев.
Давлат раҳбари ўз юрти фаровонлиги йўлида эркаклар билан баробар меҳнат қилаётган барча аёлларга миннатдорлик билдирди. Шунингдек, давлат томонидан уларга зарур ёрдам кўрсатилиши давом этишини таъкидлади.
“Менинг ташаббусим билан хотин-қизларга ҳокимият вакиллик органларида алоҳида квота ажратилди. Парламент ва маслиҳатларда хотин-қизларнинг улуши ортди ва бу борадаги ишлар изчил давом эттирилади. Аёллар Ватанимиз равнақига катта ҳисса қўшмоқда. Кўплаб аёллар тадбиркорлик фаолиятида фаол иштирок этмоқда. Кўпчилигингиз ишлаб чиқаришда, илм-фан ва спортда муваффақиятларга эришдингиз. Қозоғистондаги ўқитувчиларнинг катта қисми аёллардир. Сиз навқирон авлод қалбида ватанпарварлик, билим, меҳнатсеварликни сингдириб, миллат саломатлигини мустаҳкамлашда иштирок этасиз. Сизнинг Қозоғистон равнақига қўшган ҳиссангиз юксак қадрлашга лойиқ”, – деди Президент.