Қанча қозоғистонлик миллиардер Forbes рейтингига киритилди
ASTANА. Кazinform — Forbes дунё миллиардерларининг анъанавий рўйхатини эълон қилди, деб хабар беради Forbes.

Forbes 1987 йилдан бери дунё миллиардерларини кузатиб боради.
— Биринчи йилда биз 140 кишини топдик. Уларнинг сони 1000 дан ошиши учун йигирма йил керак бўлди. 2017 йилда уларнинг сони 2000 тага етди. Энди, саккиз йил ўтиб, биз янги маррага эришдик: бу йилги рейтингга 3028 нафар тадбиркор, инвестор ва меросхўр кирди — ўтган йилга нисбатан 247 тага кўп. Бундан ташқари, нафақат миллиардерлар сони, балки уларнинг умумий бойлиги ҳам ошган: улар ҳар қачонгидан ҳам бойроқ, умумий капитали 16,1 триллион долларни ташкил этади. Бу 2024 йилга нисбатан қарийб 2 триллион долларга кўпдир. Қўшма Штатлар миллиардерлар сони бўйича рекорд кўрсаткичга эга – 902 нафар, ундан кейинги ўринларда Хитой (шу жумладан, Гонконгда 516) ва Ҳиндистон (205) туради. Биз 2025 йил 7 март ҳолатига кўра, акциялар нархи ва валюта курслари ҳақидаги маълумотлардан фойдаландик, — дейилади нашр хабарида.
Рўйхатда Илон Маск, Марк Цукерберг ва Жефф Безос пешқадамлик қилмоқда. Уларнинг бойлиги мос равишда 342 миллиард доллар, 216 миллиард доллар ва 215 миллиард долларни ташкил қилади.
Forbes 2025 йилги дунёнинг энг бой одамлари рўйхатига етти қозоғистонлик ишбилармонни киритди: Вячеслав Ким, Михаил Ломтадзе, Тимур Турлов, Владимир Ким, Тимур ва Динара Қулибаевлар ҳамда Болат Ўтемуратов.
Вячеслав Ким — Kaspi.kz акциядори ва директорлар кенгаши раиси. Унинг бойлиги 7,1 миллиард долларни ташкил этиб, жаҳон рўйхатида 464-ўринни эгаллади.
Михаил Ломтадзе — Kaspi.kz ҳамкори, унинг бойлиги 5,9 миллиард доллар, у 597-ўринда.
Тимур Турлов — Freedom Holding асосчиси, 5,8 миллиард доллар бойликка эга бўлиб, 605-ўринни эгаллаган.
Владимир Ким — KAZ Minerals ва “Қазақмис” компаниялари акциядори, унинг бойлиги 5,7 миллиард долларни ташкил қилиб, 620-ўринни эгаллайди.
Тимур ва Динара Қулибаевлар — Алмэкс холдинги раҳбарлари бўлиб, уларнинг ҳар бирининг бойлиги 5,3 миллиард доллардан иборат бўлиб, улар 673-ўринни бўлишди.
Болат Ўтемуратов — ForteBank акциядори, унинг бойлиги 3,7 миллиард доллар, у 979-ўринда.
Forbes маълумотларига кўра, дунёдаги энг бой 20 кишининг умумий бойлиги 2,8 триллион долларни ташкил қилади.
Эслатиб ўтамиз, аввалроқ Мумбай – миллиардерлар яшайдиган Осиёдаги етакчи шаҳарга айлангани ҳақида хабар берган эдик.