Канадада боланинг қилиғи самолёт рейсининг бекор қилинишига сабаб бўлди
ASTANA. Kazinform — Канаданинг Porter Airlines авиакомпанияси рейси ўтган ҳафта кичик бола ўз ўрнига ўтириб, хавфсизлик камарини тақишдан бош тортгани сабабли тўхтатилди. Бу ҳақда Associated Press агентлиги хабар берди.
Самолётни терминалга қайтаришга тўғри келди. Шу сабабли юзага келган кечикиш туфайли аэропорт рейс учиб улгурмасидан олдин учиш-қўниш йўлагини ёпиб қўйган.
Porter Airlines компанияси якшанба куни маълум қилишича, ота-онаси ва экипаж аъзолари болани бир неча бор ўз ўрнига ўтқазиб, хавфсизлик камарини тақишга уринган. Бироқ уни кўндиришнинг иложи бўлмаган. Натижада самолёт Бритиш Колумбиясидаги Виктория халқаро аэропорти терминалига қайтган. Ота-онаси боласи ва юклари билан самолётдан тушган.
Пайшанба куни Торонто йўналишида парвоз қилган рейс тунги соат 00:30 гача, яъни аэропортдаги учиш-қўниш йўлаги ёпиладиган вақтга қадар кечиктирилган. Шу сабабли қолган йўловчилар ҳам самолётдан тушишга мажбур бўлган.
Porter Airlines йўловчилардан узр сўради. Улар эртаси куни Торонто йўналишидаги рейсга қайта жойлаштирилди.
