Қаерда яшаш ва бизнес юритиш керак: 2026 йилнинг энг яхши шаҳарлари рейтинги эълон қилинди
ASTANA. Kazinform - Oxford Economics компанияси томонидан тайёрланган Global Cities Index 2026 рейтингида дунёнинг энг яхши 100 шаҳри орасида Европа ва Шимолий Америка шаҳарлари 78 та ўринни эгаллади. Рейтингда Европадан 44 та шаҳар, АҚШдан 30 та ва Канададан яна 4 та шаҳар ўрин олган, деб хабар беради Kazinform Еuronewsга таяниб.
Индекс дунёнинг энг йирик шаҳарлари иқтисодий салоҳиятни юқори ҳаёт сифати, ривожланган инсон капитали, экологик барқарорлик ва самарали бошқарув билан қай даражада уйғунлаштира олишини кўрсатади.
Global Cities Index 2026 рейтинги етакчилари:
- 2-ўрин — Лондон
- 3-ўрин — Париж
- 6-ўрин — Дублин
- 10-ўрин — Цюрих
Глобал ўнталикдан АҚШнинг қуйидаги шаҳарлари ҳам ўрин олган:
- Нью-Йорк
- Сиэтл
- Сан-Франциско
- Бостон
- Сан-Хосе
Европада юқори ўринларни эгаллаган шаҳарлар:
- Осло
- Стокгольм
- Копенгаген
Oxford Economics компаниясининг шаҳарлар билан ишлаш бўлими директори Лиам Сайдснинг таъкидлашича, АҚШ шаҳарларининг юқори натижалари асосан «Иқтисодиёт» ва «Инсон капитали» категорияларидаги кучли кўрсаткичлар билан таъминланган.
Европа шаҳарларида эса асосий устунлик «Ҳаёт сифати», «Экология» ва «Давлат бошқаруви» кўрсаткичларида намоён бўлган.
Ҳаёт сифати, экологик кўрсаткичлар ва барқарор бошқарувни биринчи ўринга қўядиганлар учун етакчи Европа шаҳарлари юқори натижалар кўрсатган. Хусусан,
Париж ҳаёт сифати бўйича юқори баҳоланган, Дублин эса бир вақтнинг ўзида экология ва бошқарув соҳаларида яхши натижа қайд этган. Бошқарув Цюрих ва Осло шаҳарларининг асосий кучли томонларидан бири бўлган. Осло етакчи Европа ва Америка шаҳарлари орасида айнан шу категория бўйича энг юқори баллни олган.
Бизнес учун, айниқса иқтисодий қудрат ва малакали кадрларга кириш имкониятини биринчи ўринга қўядиган компаниялар нуқтаи назаридан, умумий ҳисобда устунлик АҚШ шаҳарларида қолмоқда. Нью-Йорк иқтисодиёт категорияси бўйича индексда максимал баллни олган. Сиэтл, Сан-Франциско ва Сан-Хосе ҳам иқтисодий кўрсаткичлар бўйича айниқса юқори натижалар қайд этган. Лос-Анжелес эса кучли иқтисодий кўрсаткичларни нисбатан юқори ҳаёт сифати баҳоси билан уйғунлаштира олган шаҳар сифатида ажралиб туради.
Европада Лондон алоҳида ажралиб туради. У бутун индекс бўйича инсон капитали категориясида энг юқори баллни олган. Бу шаҳардаги университетлар, бизнес муҳити ва юқори малакали мутахассисларни жалб этиш имкониятлари билан боғлиқ. Бироқ Лондон ҳаёт сифати бўйича анча паст натижа кўрсатган — атиги 77 балл.
Шу билан бирга, ҳар икки минтақада ҳам жиддий умумий муаммо мавжуд — уй-жойнинг қимматлиги ва унинг ҳамма учун ҳам етарлича қулай эмаслиги.
Ҳисоботда таъкидланишича, Лондон, Дублин ва Нью-Йорк ҳанузгача уй-жой нархларининг юқорилиги сабабли жиддий босим остида қоляпти. Бу эса юқори даромадларга қарамай, мазкур шаҳарларнинг ҳаёт сифати бўйича кўрсаткичларига салбий таъсир қиляпти.
