Кўчки туфайли Франция ва Италия ўртасидаги қатнов тўхтатилди
Испаниянинг Ўрта ер денгизи соҳилларида бўрон оқибатларига қарши кураш давом этяпти. Расмийлар аҳолини эҳтиёт бўлишга чақирмоқда.
Балеар оролларида содир бўлган кучли бўрон натижасида бир неча киши жароҳатланган, қайиқлар тўқнашиб кетган, парвозлар бекор қилинган.
Якшанба кунидан бери тез ёрдам хизматига 400 марта қўнғироқ қилинган. Мальорканинг Кальвия муниципалитетида ҳомиладор аёл устига йўл белгиси тушиши оқибатида жароҳат олди. Ильетас пляжида икки ўсмирни денгиз олиб кетди ва иккаласи ҳам қутқариб олинди.
Пальма портига қўйилган 330 метрлик Britannia круиз кемаси 120 км/соатгача бўлган кучли шамол туфайли нефть танкери билан тўқнашиб кетди. Ҳеч ким жабрланмаган.
Материк Испания, хусусан, Каталония ва Валенсия ёмғир ва дўлдан зарар кўрди.
Франция Альп тоғларидаги Морьен водийсида 700 куб метрлик тош силжиши содир бўлди.
ОАВ маълумотларига кўра, Франция ва Италия ўртасидаги темир йўл ҳаракати пайшанба кунига қадар тўхтатилган.
Кўчки туфайли маҳаллий аҳамиятга эга бўлган йўл ва А43 автомагистрали ёпилган.
«Биз бундай вазият юзага келиши мумкинлигини билардик, чунки сўнгги бир неча кун ичида ёғаётган ёмғир туфайли кўчкилар тезлашди», – дейди Морьен водийсидаги (Савойя департаменти) йўлдан фойдаланиш директори Иван Ганьер.
