Италияда катталиги теннис тўпидек дўл ёғди, 110 киши жабрланди
Венето губернатори Лука Зайянинг айтишича, жароҳатланганлар дўл ёки дўл ёғиши оқибатида синган шишалардан жароҳат олган.
«Вазиятни нормаллаштириш ва зарарни баҳолашда давом этаётган қутқарувчилар ва техник ходимларга миннатдорчилик билдираман», – деди Зайя.
Дўл жуда ғайриоддий бўлиб, осмондан муз тошлари тушган, баъзи ҳолларда диаметри 10 сантиметрдан ошган. Губернатор минтақада фавқулодда ҳолат эълон қилди.
CNN маълумотига кўра, фавқулодда хизматлар мол-мулкка етказилган зарар ва шахсий жароҳатлар туфайли ёрдам сўраган 500 дан ортиқ мурожаатларга жавоб берди, деб хабар беради Венето минтақавий фуқаролик муҳофазаси хизмати.
Ишчилар синган деразалардаги ойналарни олиб ташлашди ва бўрон пайтида қаттиқ шикастланган дарахтларни кесишди.
Бу йил Европада об-ҳаво кескин ўзгарди.
Италия, Испания ва Греция бир неча кундан бери тинимсиз жазирама билан курашяпти. Сешанба куни Италия пойтахти Римда ҳаво ҳарорати бўйича янги рекорд ўрнатилди - Целсий бўйича 41 даража иссиқ.
