Истанбулда кучли ёмғир туфайли юздан ортиқ уйни сув босди

ISTANBUL. Кazinform - Кучли ёмғир оқибатида юзага келган сув тошқинлари натижасида Истанбулдаги кўплаб турар-жой бинолари сув остида қолди, 100 га яқин киши вақтинчалик уй-жойга кўчирилди, деб хабар беради Кazinform мухбири.

Якшанба куни кучли ёмғир Истанбулнинг Европа қисмининг бир қанча ҳудудларида сув тошқинига олиб келди. Сув оқимининг кўплиги сабабли Эсенюрт ва Бейкоз муниципалитетларида йўллар ва кўчалар вақтинча тўсиб қўйилган, бошқа бир қатор туманларда жамоат транспорти ҳаракати тўхтатилган.

Вилоят ҳокими Али Ерликаянинг сўзларига кўра, кучли ёмғир туфайли 18 та туманда 134 та турар-жой, 12 та корхона, 3 та завод ва битта масжид сув остида қолган. Унинг сўзларига кўра, кун давомида жами 797 та сув тошқини чақирувлари келиб тушган бўлиб, шундан 266 таси Эсенюрт вилоятида бўлган.

Бундан ташқари, Туркия ҳукумати Фавқулодда вазиятларни бошқариш ва олдини олиш бошқармаси (АFAD) маълумотларига кўра, Бейкоз ҳудудидаги беш қаватли бинонинг томида яшин уриши натижасида ёнғин келиб чиққан. Ёнғин тезда ўчирилди ва у қўшни уйларга тарқалишга улгурмади.

Бугун эрталабдан бошлаб фуқароларнинг уйларида 200 дан ортиқ сув тошқини чақирувлари қайд этилган. Қурбонлар ва жароҳатланганлар ҳақида маълумотлар йўқ.

Фото: dha.cоm.tr