Испанияда кучли иссиқ туфайли узум йиғим-терими бу йил жуда эрта бошланди
ASTANA. Kazinform — Испанияда кучли иссиқ ҳаво туфайли узум йиғим-терими мамлакат тарихида илк бор бунчалик эрта бошланди. Каталония ҳудудида фермерлар 22 июлда узум теришга киришди, деб хабар беради AZERTAC.
Юқори ҳарорат узумнинг одатдагидан анча тез пишишига сабаб бўлди. Шу боис вино ишлаб чиқарувчилар ҳосилни эртароқ йиғиб олишга қарор қилди.
Ҳозир Каталонияда кундузи ҳаво ҳарорати 35-45 даражагача кўтарилмоқда.
Reuters Climate Monitor маълумотларига кўра, Барселонада июль ойидаги ўртача ҳарорат 65 йил аввалги кўрсаткичдан қарийб 6 даражага юқори.
Каталониялик вино ишлаб чиқарувчи Reuters агентлигига берган интервьюсида айрим ишчиларнинг соғлиғи билан боғлиқ муаммолар юзага келганини айтди.
Вино ишлаб чиқарувчилар келгуси йилларда узумни одатдагидан анча эрта йиғиб олиш ҳолатлари кўпайишини тахмин қилмоқда.
Узумни эрта йиғиш — иқлим ўзгариши шароитида Европадаги узумчилик соҳасининг янги шароитларга мослашаётганига мисоллардан бири.
Европанинг турли вино ишлаб чиқарувчи ҳудудларида ҳароратнинг кўтарилиши ва қурғоқчилик узумнинг эрта пишишига таъсир қилмоқда.
Глобал исиш Нидерландиядаги узум етиштирувчиларга ҳам таъсир кўрсатмоқда.
Бироқ бу мамлакатдаги вино ишлаб чиқарувчилар учун илиқ иқлимнинг фойдали томонлари ҳам бор. Юқори ҳарорат узумнинг яхши пишишига имкон беради.
Натижада сўнгги йилларда Нидерландияда вино ишлаб чиқариш саноати жадал ривожланмоқда.
