Ироқдаги университет биносида юз берган ёнғинда 14 киши ҳалок бўлди

Ироқ Курдистонининг ярим автоном минтақасидаги Эрбиль вилоятига қарашли Соран шаҳридаги бинода содир бўлган ёнғин оқибатида 14 киши ҳалок бўлди, 18 киши жароҳат олди, деб хабар беради Kazinform Хитойнинг Синьхуа агентлигига таяниб.

Соран шаҳри соғлиқни сақлаш бошқармаси баёнотида айтилишича, ёнғин университет талабалари ва ўқитувчилари яшайдиган учинчи ва тўртинчи қаватлардан бошланган, кейин эса бутун беш қаватли бино вайрон бўлган.

Дастлабки текширувлар ёнғинга қисқа туташув сабаб бўлганини кўрсатди. Фуқаро муҳофазаси ходимлари ва ўт ўчирувчилар кўмагида ёнғин ўчирилди.