Ироқда Telegram мессенжери блокланди
«Telegramни блоклаш қарори юқори турувчи органларнинг миллий хавфсизлик масалалари бўйича кўрсатмаларига мувофиқ ҳамда фуқароларнинг шахсий маълумотларини ҳимоя қилиш мақсадида қабул қилинди», — дейилади агентлик хабарида.
Ироқ расмийлари илова маълумотларни қайта ишлашнинг яхлитлигини бузаётганини аниқлади, бу эса қонунга зиддир. Аввалроқ Ироқ ОАВлари мамлакат аҳолисининг исм-шарифлари, манзиллари ва оилавий алоқалари каби катта ҳажмдаги шахсий маълумотларни ўз ичига олган Telegram-каналларининг машҳурлиги ҳақида хабар берган эди.
Вазирлик, шунингдек, тегишли давлат органлари Telegram иловасининг бошқарув компаниясига давлат органларининг расмий маълумотлари ва фуқароларнинг шахсий маълумотлари сизиб чиқишига олиб келадиган платформаларни ёпиш бўйича ҳамкорликни сўраб бир неча бор мурожаат қилганини таъкидлади. Бироқ, компания ушбу сўровларнинг бирортасига жавоб бермади ёки бажармади.
«Алоқа вазирлиги фуқароларнинг сўз ва мулоқот эркинлиги ҳуқуқларига давлат ва унинг институтлари хавфсизлигига зарар етказмасдан ҳурмат қилинишини тасдиқлайди ҳамда фуқароларнинг ушбу чорани тушунишига ишонч билдиради», — дейилади вазирлик хабарида.
Хизмат якшанба куни тушдан кейин фаол равишда блокланди ва Бағдоддаги фойдаланувчилар учун янги хабарлар юклаб олинмади. Илова ҳали ҳам VPN орқали уланган фойдаланувчилар учун мавжуд.
NetBlocksнинг таъкидлашича, 6 августдан бошлаб тармоқ маълумотлари Ироқ Курдистони автоном ҳудуди бундан мустасно, Ироқнинг аксарият қисмида Telegram хабар алмашиш платформасидан фойдаланиш чекланганини тасдиқлайди.
Telegram Ироқда жуда машҳур. Илова хабар алмашиш ва контент учун ҳамда янгиликлар манбаи сифатида кенг қўлланилади. Бундан ташқари, мессенжердан қуролли гуруҳлар ва Эронпараст сиёсий партиялар билан алоқадор гуруҳлар ташвиқот платформаси сифатида ҳам фойдаланилади, дея қайд этади The New Arab газетаси.
Ироқнинг собиқ бош вазири Нури ал-Маликий якшанба куни Telegramдаги тақиқдан норозилигини билдириб, ҳукумат эътиборини зўравонлик ва нафратни тарғиб қилувчи платформаларга қаратиши кераклигини таъкидлади, деб хабар беради Ироқнинг Shafaq News.
Илгари Telegram бошқа мамлакатларда ҳам блокланган эди. Апрель ойида дастур Бразилияда платформада фаолият юритаётган неонацист гуруҳлари ҳақида маълумот бермагани учун тўхтатилган эди. Икки кундан кейин апелляция шикояти асосида қарор бекор қилинди.
Муаллиф: Арсен Ўтешев
