Илон Маск Польша ташқи ишлар вазири билан Starlink бўйича тортишиб қолди

ASTANA. Kazinform - Илон Маск Х платформасида Польша ташқи ишлар вазири Радослав Сикорски билан жанжаллашиб, уни очиқчасига ҳақорат қилди, бунга Украинада Starlink сунъий йўлдош хизматининг эҳтимолий ёпилиши ҳақидаги муҳокама сабаб бўлди, деб хабар беради Кazinform агентлиги BILDга таяниб.

Сикорскининг хавотирларига жавобан Маск: «Be quiet, small man» ("Жим бўл, кичкина одам"), деб ёзган. Шу билан бирга, миллиардернинг қўшимча қилишича, Польша харажатларнинг озгина қисмини қоплайди, Starlinkга муқобил йўқ.

Сикорски, ўз навбатида, аввалроқ Польша Starlinkдан Украина манфаатлари йўлида фойдалангани учун ҳар йили тахминан 50 миллион доллар тўлашини маълум қилган эди. Унинг таъкидлашича, агар Starlink ишончли ҳамкор бўлишни тўхтатса, Варшава муқобилларни излашга мажбур бўлади.

Америка ҳарбий ёрдами ва разведка маълумотлари алмашинуви тўхтатилганидан сўнг Киевдаги хавотирлар фонида Маск Starlink Украинада фаолиятини давом эттиришини айтди.

"Украина сиёсати билан қанчалик келишмасам ҳам, Starlink ҳеч қачон ўчирилмайди. Бу тизим ҳеч қачон босим воситаси сифатида ишлатилмайди”, — деди Маск.

Starlink олдинги чизиқларда, айниқса чекка ҳудудларда алоқаларни таъминлашнинг асосий воситасига айланди. 2022 йил февраль ойида Россия босқинчилиги бошланганидан кейин Маск Украинага тизимга кириш ҳуқуқини берди.

Аввалроқ Kazsat ва Oneweb сунъий йўлдошлари Қозоғистонда Starlink ўрнини босиши мумкинлиги ҳақида хабар берилган эди.