Илон Маск Пентагоннинг янги лойиҳасига қўшилади
ASTANА. Кazinform — Илон Маск Дональд Трамп маъмуриятига қайта қўшилишга тайёр. У Пентагоннинг янги "Меридиан" лойиҳасига Палмер Лаки ва Ньют Гингрич билан бирга ҳамраислик қилади. Бу ҳақда АҚШ Мудофаа вазири Пит Хегсет маълум қилди, деб хабар беради Axios.
Лойиҳа 4 ойга мўлжалланган. Унинг иштирокчилари қурол ва ҳарбий технологияларни ривожлантиришнинг истиқболли йўналишларини ўрганадилар ва келажакда АҚШ Қуролли Кучларига қандай имкониятлар керак бўлиши мумкинлигини аниқлайдилар.
Хегсетнинг сўзларига кўра, лойиҳа доирасида янги сиёсат ҳужжатлари ишлаб чиқилмайди. Асосий эътибор Пентагон ўзлаштириши керак бўлган истиқболли йўналишлар ва технологияларни ўрганишга қаратилади.
Вазирнинг сўзларига кўра, лойиҳага технология саноати, бизнес ва илмий ҳамжамият вакиллари, шунингдек, миллий хавфсизлик соҳасидаги мутахассислар жалб қилинади. Лойиҳага АҚШ Мудофаа вазирининг тадқиқот ва ишланмалар бўйича ўринбосари Эмил Майкл раҳбарлик қилади.
Хегсетнинг таъкидлашича, Пентагон технологияларни ривожлантириш истиқболларини баҳолаш учун ҳарбий вазирликдан ташқарида ишлайдиган мутахассисларнинг тажрибасидан фойдаланишни режалаштирмоқда.
Палмер Лакининг сўзларига кўра, лойиҳа иштирокчилари нафақат ҳозирги можароларни, балки келгуси ўн йилликлар учун мумкин бўлган сценарийларни ҳам кўриб чиқадилар. Хусусан, улар Қўшма Штатлар ҳозирда қандай технологиялар ва имкониятларни ривожлантириши кераклигини баҳолайдилар.
Тўрт ойлик иш охирида гуруҳ истиқболли технологияларни ишлаб чиқиш, синовдан ўтказиш ва жорий этиш бўйича ўз хулосалари ва тавсияларини тақдим этиши керак.
Эслатиб ўтамиз, Пентагон ҳар бешинчи генерал ва адмирални қисқартиради.
