Илон Маск Х тармоғини сотиб олиш нархидан 55% га арзон баҳолади

Илон Маск илгари Twitterноми билан танилган Х компаниясининг қийматини 19 миллиард долларга баҳолади. Бир йил аввал миллиардер уни 44 миллиард долларга сотиб олган эди. Kazinform бу ҳақда компаниянинг ички ҳужжатларини ўрганиб чиққан The Verge нашрига асосланиб хабар беради.

30 октябрда Х компаниясининг ходимлари компаниядаги улушларини бир акция учун 45 доллардан олди. Бу компаниянинг қиймати 19 миллиард доллар дегани. Ҳужжатларда айтилишича, "акцияларнинг адолатли бозор қиймати Х компаниясининг директорлар кенгаши томонидан белгиланади". Маскнинг ўзи ҳали бу кенгашни тўлиқ шакллантиргани йўқ.

Х акцияларига эгалик қилувчи йирик инвесторлардан бири бўлган Fidelity молиявий холдинг компанияси маълумотларига кўра, компаниянинг ҳақиқий қиймати Маск Twitterни сотиб олган дастлабки нархдан 65 фоизга паст.

Pew Research Centerнинг ҳисоб-китобларига кўра, Twitterнинг АҚШдаги энг фаол фойдаланувчиларининг 25 фоизи платформадан камроқ фойдаланишни ва камроқ твит ёзишни бошлаган.

Guideline таҳлилий фирмаси томонидан ўтказилган тадқиқотга кўра, АҚШда Х тармоғидаги ойлик реклама даромади ўтган йилга нисбатан камида 55 фоизга камайган.

Эслатиб ўтамиз, Илон Маск Twitter ижтимоий тармоғини ўтган йилнинг октябрида 44 миллиард долларга сотиб олган эди.

Кейинчалик Маск тармоқ фойдаланувчилари учун янги талабларни жорий қила бошлади. Мисол учун, Twitter постларини ўқиш учун янги вақт чегараси жорий этилди. Тасдиқланган фойдаланувчилар - 10 минг, тасдиқланмаган аккаунтлар - 1 минг, янги тасдиқланмаган аккаунтлар - кунига фақат 500 твитларни кўриш мумкин.

Шунингдек, Twitter қуш логотипи Х га ўзгартирилди.

Шу йил сентябрь ойида миллиардер Х ижтимоий тармоқни барча фойдаланувчилар учун пуллик қилиш ниятида экани хабар қилган эди.