Илон Маск Ғазодаги гуманитар ташкилотларга Starlinkга кириш имконини беради

Миллиардер Илон Маск ўзининг Х ижтимоий тармоғида Starlink космик компанияси ўз сунъий йўлдошларига Ғазо секторида жойлашган халқаро ташкилотларга уланиш имкониятини тақдим этишини ёзди, деб хаба беради Kazinform BBCга таяниб.

Исроил армиясининг амалиёти давомида Ғазо секторида алоқа узилиб қолган. “Чегара билмас шифокорлар” ва Қизил Хоч вакиллари Ғазода ишлаётган шифокорлар билан алоқа узилганини маълум қилди. Электр узилиши шифохоналар билан боғланишни ҳам имконсиз қолдирди.

Шу фонда Х фойдаланувчилари Маскни Ғазо секторидаги одамларга Starlink хизматига кириш ҳуқуқини беришга чақириб, #starlinkforgaza хештеги билан хабарлар жойлаштирди.

Ғазодаги халқаро ташкилотлар Starlinkга қанчалик тез уланиши номаълум, чунки кириш учун махсус жиҳозлар керак бўлади.

Фаластин телекоммуникация ва ахборот технологиялари вазири Ишоқ Сидр халқаро ташкилотлар билан уларни Ғазо секторидаги Starlink тармоғига улаш борасида ҳаракатда эканлигини маълум қилди.