Ҳукумат тиббиёт ходимларини ҳимоя қилишни кучайтириш бўйича чора-тадбирлар комплексини тайёрлайди
ASTANА. Кazinform – Қозоғистон Республикаси Бош вазири Олжас Бектенов Президент Қасим-Жомарт Тоқаевнинг тиббиёт ходимлари ҳимоясини кучайтириш ва соғлиқни сақлаш муассасаларида хавфсизликни таъминлаш бўйича топшириқлари ижросига бағишланган йиғилиш ўтказди. Бу ҳақда Ҳукумат матбуот хизмати хабар берди.
Унда Бош вазир ўринбосари Ермек Кўшербаев, Соғлиқни сақлаш вазири Ақмарал Алназарова, Ички ишлар вазири Ержан Саденов, Адлия вазири ўринбосари Лаура Мерсалимова иштирок этди.
Соғлиқни сақлаш вазирлиги маълумотларига кўра, 2019йилдан буён Қозоғистонда шифокорлар, фельдшерлар, ҳамширалар ва бошқа тиббиёт ходимларига ҳужум қилишнинг 170 дан ортиқ ҳолати қайд этилган.
Соғлиқни сақлаш вазири хабар берганидек, шифокорларга ҳужумлар ҳуқуқни муҳофаза қилиш органлари ходимларига шахсий таҳдид қилиш ҳаракатларига тенглаштирилиши, шунингдек, тиббиёт ходимларига смарт-видеожетонлар бериш, шифохоналарда яхлит қўриқлаш тизимини жорий этиш, қабулхоналарда 24 соат ишлайдиган полиция пунктларини жойлаштириш каби қатор қонун ҳужжатларига ўзгартиришлар тайёрланади.
Олжас Бектенов тиббиёт ходимлари хавфсизлигини таъминлаш муҳимлигига эътибор қаратди.
— Давлат раҳбари топшириқлари ижросини таъминлаш зарур. Шифокорларга бундай ҳужумлар қонуний йўллар билан қатъиян тўхтатилиши керак. Шу муносабат билан Соғлиқни сақлаш, Ички ишлар ва Адлия вазирликларига ўн кун муддатда тиббиёт ходимларига нисбатан ўз хизмат вазифаларини бажариш чоғида зўравонлик содир этганлик учун жиноий жазони назарда тутувчи қонун ҳужжатларига ўзгартиришлар ишлаб чиқиш ва киритишни топшираман, — деди Бош вазир.
Ички ишлар вазирининг сўзларига кўра, шифохоналар ва перинатал марказларнинг қабулхоналарида кечаю кундуз ишлайдиган полиция постлари ташкил этилган. Жами 115 та тиббиёт муассасаси ҳимояга олинган. Можароларга тезкорлик билан жавоб бериш мақсадида кўрсатилган муассасалар яқинида маршрут патруллари ўрнатилди. Айни пайтда тиббиёт муассасаларида хавфсизликни таъминлаш бўйича алоҳида чора-тадбирлар кўрилди.
Бундан ташқари, аҳоли ўртасида профилактика ва тушунтириш ишларини кучайтириш бўйича кўрсатмалар берилди.
