Хорватияда қозоқ халқининг маданияти таништирилди

ZAGREB. Кazinform – Хорватияда қозоқ халқининг маданияти, анъаналари ва мусиқий ижоди тақдимоти бўлиб ўтди, деб хабар беради Кazinform ҚР ТИВ маълумотига таяниб.

Қозоғистон элчихонаси кўмагида Хорватияда илк бор «TURAN» этно-фольклор ансамблининг концерти муваффақиятли ўтказилди. Хорватия Республикаси Парламенти вице-спикери Даворко Видович ўзининг табрик сўзида давом этаётган маданий тадбирнинг аҳамиятини алоҳида таъкидлади. Унинг сўзларига кўра, концерт нафақат қозоқ халқининг бой ижоди билан яқиндан танишиш, балки мамлакатлар ўртасидаги дўстлик ва ўзаро ҳамжиҳатликни мустаҳкамлашга ҳисса қўшиш имконини берди.

Гуруҳнинг кучли қуввати, мумтоз куйларнинг виртуоз овози, халқ қўшиқларининг ўзига хос жанри ва куйлаш техникаси залдагиларни бефарқ қолдирмади ва Хорватия жамоатчилигида катта ҳайрат ва олқишларга сабаб бўлди. Мусиқа ихлосмандларини қобиз, сибизғи, жетиген, шертер, домбра ва бошқа қадимий қозоқ чолғу асбобларининг сеҳрли садолари ҳайратга солди.

Загребдаги Мусиқа академиясининг концерт залида «Қазақконцерт»нинг бошқа солистлари: Қозоғистонда хизмат кўрсатган арбоб Ақтоти Райимқулова, таниқли тенор Медет Шотабаев, таниқли пианиночи ва концертмейстер Дина Мирманова, шунингдек, Шанхай консерваторияси талабаси, виолончелчи Талғар Толқинули ҳам ажойиб чиқиш қилдилар. Залга йиғилган томошабинлар санъаткорларнинг чиқишларини олқишлашди.

Кечанинг ўзига хос муҳитини этнокўргазма тақдим этди. Унинг доирасида Хорватия пойтахти аҳолиси учун биринчи марта кигиз уйнинг ранг-баранг ички безаклари намойиш қилинди. Декоратив-амалий санъат объектлари, қозоқ миллий кийимлари, фотосуратлар ва қозоқларнинг анъанавий таомлари кўп асрлик тарих ва бой меросга эга бўлган кўчманчи халқ маданиятини кўрсатиб берди.

Тадбирда Қозоғистон фуқаролари, Хорватия ҳукумати аъзолари, мамлакатнинг собиқ президентлари, парламент депутатлари, бизнес, дипломатик, илмий ва ижодий гуруҳлар вакиллари иштирок этди. Зал тўлиб кетгани сабабли концертга кела олмаган меҳмонлар учун «YouTube» каналида жонли эфир ташкил этилди.

Ўтган воқеа нафақат қозоқ халқининг маданий меросининг хорижда машҳур бўлишига ёрдам берди, балки замонавий Қозоғистонга қизиқишни сезиларли даражада оширди. Маданий кечанинг кўплаб меҳмонлари Қозоғистон билан яқиндан танишиш ва тез орада шу мамлакатга келиш истагини билдирди.

Фото: gov.kz