Хитойнинг кемасозлик корпорацияси раҳбари пора олгани учун 13 йилга қамалди

Хитойда China Shipbuilding Corporation компаниясининг собиқ раиси порахўрлик ва мансаб ваколатини суиистеъмол қилганликда айбланиб, 13 йилга озодликдан маҳрум этилди, деб хабар беради Каzinform агентлиги Синьхуага таяниб.

Сешанба куни Хитой суди Хитой кемасозлик корпорацияси (CSIC) собиқ раиси Ху Вэньминни порахўрлик ва мансаб ваколатини суиистеъмол қилганликда айблаб, 13 йиллик қамоқ жазосига ҳукм қилди.

Шанхай биринчи оралиқ халқ суди қарори билан Ху Вэньминга 5 миллион юань миқдорида жарима солинди ва пора сифатида олган барча пуллари мусодара қилинди ва давлат ғазнасига ўтказилди.

Суд Ху Вэньминни 2001 йилдан 2020 йилгача давлат корхоналарида турли лавозимларни эгаллаб турган вақтида ўз мансабини суиистеъмол қилганликда, тегишли ташкилот ва жисмоний шахсларга қурилиш шартномалари тузишда, бизнес ҳамкорликни йўлга қўйишда, ўз мулкига эга бўлишда, мартаба кўтарилишида ва омонатларни жалб қилишда ёрдам берганликда айбдор деб топди.

Бунинг эвазига Ху Вэньмин улардан 59,86 миллион юаньдан (тахминан 8,43 миллион АҚШ доллари) ортиқ нақд пул ва қимматбаҳо буюмларни олган.

Суд ҳукмида қайд этилишича, у 2013-2015 йиллар давомида CSIC шўба корхонасини қайта қуриш жараёнида CSIC раиси сифатида ўз ваколатларини суиистеъмол қилиб, миллий манфаатларга катта миқдорда зарар етказган.