Хитойда кексалар сони илк бор болалар сонидан ошиб кетди
ASTANA. Kazinform — Хитойда тарихда илк бор кексаларга тушадиган демографик юклама болаларга тушадиган юкламадан ошиб кетди. Бу ҳақда Kazinform агентлигининг махсус мухбири маҳаллий оммавий ахборот воситаларига таяниб хабар берди.
Хитой Халқ Республикаси Давлат статистика бюроси маълумотларига кўра, 2025 йилда мамлакатда 65 ёшдан ошган аҳоли сони 223,65 миллион кишига етган. 0 ёшдан 14 ёшгача бўлган болалар сони эса 212,76 миллион нафарни ташкил этган.
Демографик юкламaнинг умумий коэффициенти 45,1 фоизга тенг бўлган. Шу билан бирга, кексаларга тушадиган юклама кўрсаткичи 23,1 фоизгача ошиб, болаларга тушадиган юкламадан (22 фоиз) юқори бўлган.
Мамлакатнинг бир қатор ҳудудларида туғилиш кўрсаткичининг пасайиши ва боғчаларга қатнайдиган болалар сонининг камайиши натижасида бўш қолган мактабгача таълим муассасалари кексалар уйлари ва геронтология марказларига айлантирилмоқда. Илгари тарбиячилар тайёрлаган коллежларда эса ҳозир кексаларга ғамхўрлик қилиш хизматларини ақлли технологиялар ёрдамида бошқариш ҳамда ижтимоий хизмат кўрсатиш йўналишлари бўйича мутахассислар тайёрланмоқда.
Кекса ёшдаги аҳоли сонининг ортиши «кумуш иқтисодиёт»нинг ривожланишига туртки берди. Хитойда кексаларга хаттотлик ва қўшиқ айтиш, сунъий интеллектдан фойдаланиш, видеомонтаж қилиш ҳамда учувчисиз учиш аппаратларини бошқаришни ўргатадиган мутахассисларга талаб ортиб бормоқда.
Эслатиб ўтамиз, аввалроқ Хитойда аҳолининг қариши тезлашиб, оилавий парвариш етишмовчилигини қоплашга қаратилган «ижарага олинадиган фарзандлар» хизмати оммалаша бошлагани ҳақида хабар берилган эди.
