Хитойда кафе портлаши қурбонлари сони етти нафарга етди
Фавқулодда вазият натижасида ҳалок бўлганлар сони етти нафарга етди, яна 27 киши жароҳат олди. Хитой шимолидаги Хэбэй провинцияси Саньхэ шаҳридаги кафеда портлаш содир бўлди. Бу ҳақда Kazinform мухбири Xinhua агентлигига таяниб хабар беради.
13 март куни эрталаб тўрт қаватли бинода жойлашган кафеда газ сизиб чиқиши оқибатида портлаш содир бўлди. Фавқулодда ҳодиса натижасида бино қисман қулаб тушган, бино яқинида жойлашган автомобилларга зарар етган.
Ҳодиса оқибатларини бартараф этиш учун 36 бирлик махсус техника ва 150 дан ортиқ қутқарувчи жалб қилинган.
Барча жабрланганлар зудлик билан шифохонага етказилган. Шу кунгача уларнинг 14 нафари тиббий муассасадан чиқарилган.
Эслатиб ўтамиз, аввалроқ бир киши ҳалок бўлгани ва 22 киши жароҳат олгани ҳақида хабар берилган эди.
