Хитойда ҳибсга олинган уч америкалик АҚШга қайтди

ASTANA. Kazinform - АҚШ Давлат департаменти АҚШнинг уч фуқароси – Марк Свидан, Кай Ли ва Жон Люн Хитойда озод этилгани ва уларнинг ҳар учаласи ҳам аллақачон АҚШга қайтиб келгани ҳақида маълум қилди, деб хабар беради Кazinform мухбири NBC Newsга таяниб.

Асли Нью-Йорк штатининг Лонг-Айленд шаҳридан бўлган 62 ёшли К. Ли 2016 йилда ҳибсга олинган ва 2018 йилда жосусликда айбланиб, 10 йиллик қамоқ жазосига ҳукм қилинган.

40 ёшлардаги техаслик тадбиркор М. Свидан 2012 йилдан бери ҳибсда эди ва 2019 йилда гиёҳванд моддалар билан боғлиқ айбловлар билан айбланиб, шартли ўлим жазосига ҳукм қилинди. БМТ ишчи гуруҳига кўра, айбловлар ҳеч қандай далил базасига эга эмас эди.

Гонконгда доимий яшаш жойига эга 70 ёшлардаги америкалик Ж. Люн ўтган йили жосусликда айбдор деб топилиб, умрбод қамоқ жазосига ҳукм қилинган эди.

Уларнинг озод этилиши Хитой Давлат хавфсизлик вазирлиги зобити Сюй Яньцзюн ва Хитой фуқароси Цзи Чаоцюн ўртасида маҳбуслар алмашинуви доирасида амалга оширилди, деди АҚШ ҳукумати расмийси.

С. Яньцзюн АҚШнинг самолёт двигателлари етказиб берувчи «GE Aviation» компаниясидан технология ўғирлашга уринганликда айбланиб ҳибсга олинган, Ц. Чаоцюн эса Хитой ҳукумати фойдасига жосуслик қилганликда айбланган.

Пайшанба куни Жо Байден журналистларга уч америкалик билан гаплашганини айтди.

"Уларнинг уйда эканлигидан жуда хурсандман", - деди Жо Байден.

АҚШ Давлат департаменти барча америкаликлар Хитойда ноҳақ ҳибсга олинганини айтди. Ўз навбатида Пекин барча ишлар қонун доирасида кўрилганини маълум қилди.