Ҳиндистон ва Непалда сув тошқини ва кўчкилар оқибатида 70 киши ҳалок бўлди
ASTANA. Kazinform — Ҳиндистонда кучли ёмғир, сув тошқини ва кўчкилар оқибатида 56 киши, Непалда эса 14 киши ҳалок бўлди. Непалда яна 11 киши бедарак йўқолганлар қаторида, деб хабар беради Reuters.
Ҳиндистоннинг Уттар-Прадеш штатида 25 сентябрдан 27 сентябрь тонгига қадар 66,5 мм ёмғир ёккан. Бу мазкур давр учун меъёрий кўрсаткичдан анча юқори. Меъёр бўйича ушбу вақт оралиғида 7,6 мм даражасида ёғингарчилик бўлиши керак.
Қутқарув хизматлари сув босган ҳудудларда ишларни давом эттирмоқда. Ҳокимият гуманитар ёрдам тарқатиб, қишлоқ хўжалигига етказилган зарарни баҳоламоқда.
Ҳиндистонда ҳалок бўлган 56 кишидан ташқари, 46 киши жабрланган, мингдан ортиқ уй зарар кўрган.
Непал ҳукумати мамлакатдаги 77 округнинг 49 тасида тўсатдан юзага келиши мумкин бўлган сув тошқинлари хавфи борлигидан огоҳлантирди. Уларнинг ярмидан кўпида йирик дарёлар ва уларнинг ирмоқларида сув сатҳининг кўтарилиши сабабли сув тошқини ва сел хавфи юқори бўлиб турибди.
Непалнинг бир қатор ҳудудларида электр таъминоти тизими тўлиқ ишдан чиққан. Рахуганга дарёсидаги сув тошқини қуввати 40 МВт бўлган гидроэлектр станцияси инфратузилмасига, шунингдек, электр узатиш тармоқларининг устунларига зарар етказган.
Ҳиндистонда Марказий сув комиссияси етти штатдаги 30 та гидрологик станцияда вазият жиддий эканини маълум қилди. Ганг, Гандак, Коси, Багмати ва Нармада дарёларини ўз ичига олган бир қатор йирик дарёларда сув сатҳи хавфли чегарадан ошиб кетган.
Сув тошқини ва кўчкилар Непалнинг айрим ҳудудларида телекоммуникация тизимининг ишлашига ҳам халақит берган. Бунга оптик толали тармоқларнинг шикастланиши ва электр таъминотидаги узилишлар сабаб бўлган.
Бундан ташқари, Непалнинг шимолидаги Мананг округида баландлиги 7126 метр бўлган Химлунг-Химал тоғи яқинидаги базавий лагерь қор кўчкиси остида қолиши туфайли 10 нафар маҳаллий ишчи бедарак йўқолган.
Эслатиб ўтамиз, Непалда 26 августда содир бўлган вайронкор сув тошқинида ҳалок бўлганлар муносабати билан 7 сентябрь Миллий мотам куни деб эълон қилинган эди. Давлат муассасаларида байроқлар туширилди, ҳалок бўлганларнинг оилалари анъанавий мотам маросимларини ўтказди. Непалдаги сув тошқини оқибатида ҳалок бўлганлар сони 1,4 минг кишидан ошган.
