Хайнанда Боао Осиё форуми бошланди
ASTANA. Kazinform - Хитой жанубидаги Хайнан провинциясида “Осиё ва дунё: умумий муаммолар, умумий масъулият” шиори остидаги Боао Осиё форуми (БОФ) бошланди, деб хабар беради Kazinform мухбири.
Анъанага кўра, БОФ матбуот анжумани билан очилади, унда ташкилотчилар Осиё минтақасидаги ижтимоий-иқтисодий вазият бўйича ҳисоботларни тақдим этиши кутилмоқда. Форум тўрт кун давом этади ва унда 50 га яқин тадбир ўтказилади. БОФнинг очилиш маросими 28 мартда бўлиб ўтади ва унда ХХР парламенти спикери Чжао Лэцзи, хорижий давлатлар раҳбарлари ва йирик халқаро ташкилотлар раҳбарлари иштирок этади.
БОФ майдонида деярли 5 минг киши, шу жумладан 1 мингдан ортиқ журналист тўпланади.
Форум иштирокчилари орасида БМТнинг собиқ Бош котиби Пан Ги Мун, Шанхай ҳамкорлик ташкилоти Бош котиби Чжан Мин, ОҲИЧК Бош котиби Қайрат Сарибай, Жануби-Шарқий Осиё давлатлари ассоциацияси бош котиби Као Ким Хорн, ИҲТТ Бош котиби Матиас Корманн, Осиё инфратузилма сармоялари банки президенти Цзинь Лицюнь ҳам бор.
Форумда бир қатор йирик халқаро компаниялар вакиллари ҳам иштирок этади. Хусусан, Американинг Xcoal Energy&Resources компанияси раҳбари Эрни Трешер, Жанубий Кореянинг Samsung компанияси, Британия-Швеция AstraZeneca компанияси раҳбарияти вакиллари, Хитойнинг йирик нефть-газ, энергетика, сармоявий ва молиявий компаниялари раҳбарлари.
Бу йил БОФнинг йиллик конференциясида “жаҳон иқтисодиёти”, “илмий ва технологик инновациялар”, “ижтимоий ривожланиш”, “халқаро ҳамкорлик” масалалари муҳокама этилади.
2001 йилда ташкил этилган Боао Осиё форуми 29 аъзо давлат томонидан биргаликда тузилган нодавлат халқаро ташкилотдир. БОФни ташкил этишдан мақсад Осиёда иқтисодий интеграцияни ривожлантириш эди. Боао форуми “Шарқ Давоси” деб номланади, у Осиё ва бошқа қитъаларнинг сиёсий, бизнес ва академик етакчилари учун Осиё ва глобал муаммоларни муҳокама қилиш учун юқори даражадаги глобал мулоқот майдонига айланди.
