Грециядаги ўрмон ёнғинлари: ёнғин ўқ-дорилар омборига етиб келди

АFINА. Kazinform – Ўт ўчирувчилар ўрмон ёнғинларининг Греция марказидаги ҳарбий объектларга ўтишини тўхтата олмади. Грециянинг Эгей денгизи соҳилида Волос ҳарбий-ҳаво кучлари базаси яқинида кучли портлашлар эшитилиб, алангага айланган. Ўрмон ёнғинлари натижасида бу ерда ўқ-дорилар омборлари вайрон бўлди, дея хабар беради Kazinform Еuronewsга таяниб.

Ходимлар ва F-16 самолётлари олдиндан бошқа базага олиб кетилган. Ўт ўчириш бригадаси 12 та аҳоли пункти эвакуация қилинганини эълон қилди. Расмий маълумотларга кўра, ўқ-дориларнинг портлаши оқибатида ҳеч ким жиддий жароҳат олмаган.

Волос шаҳри ҳудудидаги ёнғин Грецияда фавқулодда хизматлар олиб бораётган 124 та ўрмон ёнғинлари ичида энг хавфлиси ҳисобланади. Шу жумладан туризмга боғлиқ бўлган ҳудудлар ҳам жабр кўрмоқда: ташриф буюрувчиларни эвакуация қилиш маҳаллий бизнесга жабр келтиради.

«Молиявий жиҳатдан Киотати ҳудудидаги бирорта оила қишдан омон қолмайди. Бу қийин, чунки ҳамма объект ёпиқ. Қандай қилиб очасиз? Ким учун ишлаш керак? Маҳаллий аҳоли учунми? Улар ҳар куни кечки овқатга чиқишмайди. Ҳеч ким ҳар куни овқат ейишга ресторанга бормайди», – деди La Strada ресторани эгаси Елена Хрисафинас.

Ҳукумат Грециядаги аксарият курортлар сайёҳлар учун етарли даражада хавфсиз эканлигини таъкидламоқда. Мамлакатдаги вазият ўн кундан ортиқ вақтдан бери оғирлигича қоляпти. Табиий ёнғинлар вилоятларнинг деярли ярмида қайд этилган. Биргина Родоснинг ўзида ўн минглаб одамлар офат зоналаридан эвакуация қилинган.